Սեպտեմբերի 3-ին սպորտի եւ երիտասարդության հարցերի նախարարությունում կայացել է  «2014 թվականի երիտասարդական մայրաքաղաք» մրցույթի ամփոփիչ  բաց նիստը, որտեղ հաղթող է ճանաչվել Սիսիանը:

Նիստին մասնակցել են մրցույթի  կազմկոմիտեի անդամները, անկախ  փորձագետներ, հաղթանակի ձգտող քաղաքների եւ լրատվամիջոցների ներկայացուցիչներ:

Ամիսներ առաջ հայտարարված մրցույթին  մասնակացության հայտ էին ներկայացրել Սիսիան ու Էջմիածին քաղաքները: Անկախ փորձագետների խնդիրն էր մանրակրկիտ ուսումնասիրել քաղաքապետարանների հայտերում նշված  եւ իրականում ունեցած հնարավորությունների համապատասխանությունը (մարզամշակութային  կենտրոններ, երիտասարդական միջոցառումների կազմակերպում,  հյուրանոցային պայմանների, երիտասարդական ժամանցային օբյեկտների գների մատչելիությունը եւ այլն):

 Մրցույթի առցանց  քվեարկության եւ անկախ փորձագետների գնահատման արդյունքները հրապարակեց սպորտի եւ երիտասարդության հարցերի նախարարի տեղակալ  Արսեն Քարամյանը:

Փորձագիտական գնահատման եւ առցանց քվեարկության արդյունքների համաձայն   «2014 թվականի երիտասարդական մայրաքաղաք» մրցույթում հաղթող է ճանաչվել Սիսիանը:

Էջմիածնին ձայն էին տվել 8416, իսկ Սիսիանի օգտին քվեարկությանը մասնակցել էր` 9246 մարդ` ընդ որում առցանց  քվեարկությանը մասնակցել էին ինչպես հանրապետությունում, այնպես էլ արտերկրում բնակվող մեր համաքաղաքացիները:

Ըստ փորձագիտական հանձնաժողովի անդամների գնահատականների` Էջմիածին քաղաքի հայտի ընդհանուր գնահատականը եղել է 705 միավոր, Սիսիանինը` 845:

«Սա գործընթացի սկիզբն է եւ այն  ապացուցեց , որ  բարեհաջող երթ է ունենալու: Բազմաթիվ քննարկումներ են եղել թե’ անկախ փորձագետների ու թե’ նախարարության աշխատողների հետ համատեղ, մեր աշխատանքը եղել է անաչառ, մրցակցությունը` լուրջ, վստահեցնում եմ, որ «Երիտասարդական մայրաքաղաք – 2015թ.»-ը եւ «Երիտասարդական մայրաքաղաք -2016թ.»-ն էլ ավելի լավն են լինելու,- նշեց փոխնախարարը:

Հաղթած քաղաքի ղեկավար Աղասի Հակոբջանյանն ընդունելով շնորհավորանքները` իր սրտի խոսքն ասաց՝ դիմելով ներկաներին ու իր համաքաղաքացիներին. «Վստահեցնում եմ ձեզ , առաջիկա տարում Սիսիանը կդառնա  Հայաստանի Հանրապետության ողջ երիտասարդության մայրաքաղաքը, կկազմակերպվեն գեղեցիկ միջոցառումներ,  կլինեն հետաքրքիր հանդիպումներ, մշակութային երեկոներ, անպես որ հրավիրում եմ բոլորիդ մեզ հետ միասին վայելելու երիտասարդական մայրաքաղաքի բոլոր միջոցառումները»:

«Երիտասարդական մայրաքաղաք» մրցույթում հաղթող ճանաչված քաղաք լինելը ենթադրում է` կառավարության կողմից բյուջետային  հատկացումներ` երիտասարդական ծրագրերով նախատեսած բազմաթիվ միջոցառումների կազմակերպում եւ իրականացում տվյալ քաղաքում` ողջ տարվա կտրվածքով, ինչն էլ իր հերթին ենթադրում է ֆինանսական հոսքեր` մայրաքաղաքից դեպի մարզեր:  Սիսիանի քաղաքապետին առաջին շնորհավորողներից մեկը միջոցառմանը ներկա Էջմիածին քաղաքի ներկայացուցիչ Անահիտ Նահատակյանն էր: