Ադրբեջանի ԱԳՆ-ն «սեւ ցուցակի» կազմում նախաձեռնելով փորձում է սպառնալ եւ միաժամանակ խոչընդոտել Լեռնային Ղարաբաղ արտասահմանյան երկրների ներկայացուցիչների այցելություններին:  Այս մասին հայտարարել է Մեծ Բրիտանիայի լորդերի պալատի անդամ բարոնուհի Քերոլայն Քոքսը NEWS.am, haynews.am եւ  tert.am գործակալությունների թղթակիցների հետ զրույցում:

 «Պատճառն այն է, որ Ադրբեջանը վախենում է, թե Արցախ այցելող մարդիկ կարող  են իմանալ ճշմարտությունը», - կարծում է բարոնուհին: «Մենք  «սեւ ցուցակում» հայտնվածներից ենք, եւ դա պատիվ ենք համարում: Մենք շատ հպարտ ենք, որ մեր անուններն այդ ցուցակում են՝ պատվավոր շատ մարդկանց անունների կողքին: Ես այս ամենին հումորով եմ վերաբերվում՝ իբրեւ մեծ կատակի», - նշել է բարոնուհի Քոքսը:

Հիշեցնենք, խոսքն առանց Ադրբեջանի ԱԳՆ-ի գիտության Լեռնային Ղարաբաղ այցելած քաղաքացիների ցուցակի մասին է: Մի քանի հարյուր անուններից կազմված ցուցակում ընդգրկված են նաեւ Մոնսերատ Կաբալյեն եւ Ալ Բանոն:

Լուսանկարը՝ Արսեն Սարգսյանի / NEWS.am