Լրագրող Գլեն Գրինվալդը, որը Էդվարդ Սնոուդենի բացահայտումների հիման վրա հոդվածաշար էր հրապարակել, հեռանում է բրիտանական The Guardian թերթից:  Գրինվալդը հոկտեմբերի 15-ին հայտնել է, որ նոր աշխատանքի առաջարկ է ստացել, եւ որ լրագրողի կարիերայում  նմանատիպ առաջարկները եզակի են լինում:

Գրինվալդը միաժամանակ նշել է, որ The Guardian-ի հետ համագործակցությունը եղել է արգասաբեր եւ արդյունավետ եւ նման որոշում հեշտ չի կայացրել:  The Guardian-ի ներկայացուցիչներն իրենց հերթին նշել են, որ վշտացած են Գրինվալդի հեռանալու համար, սակայն հասկանում են նոր դերում ուժերը փորձելու նրա ձգտումները եւ ամենալավն ու բարին են ցանկանում նրան, հայտնում է lenta.ru-ն:

Գրինվալդն առայժմ հրաժարվել է տվյալներ հայտնել իր նոր աշխատավայրի մասին:

Reuters-ն իր աղբյուրները վկայակոչելով հայտնում է, որ Գրինվալդն այժմ զբաղվում է մեդիանախագծով, որը ֆինանսավորում է  eBay-ի հիմնադիր Պիեռ Օմիդյարը:

Մշտապես Բրազիլիայում բնակվող Գլեն Գրինվալդը 2013թ. ամռանը The Guardian-ի համար  հոդվածաշար էր գրել հատուկ ծառայությունների աշխատաոճի մասին՝ հիմնվելով ԿՀՎ-ի նախկին գործակալ Էդվարդ Սնոուդենի տրամադրած փաստաթղթերի վրա: