Ոստիկանության Նոր Նորքի բաժնի ծառայողները դեկտեմբերի 17-ին Երեւանի Գյուրջյան փողոցի թիվ 11 շենքի մոտից, խարդախություն կատարելու կասկածանքով, բերման են ենթարկել 1987 թ. ծնված Գարիկ Ե.-ին: Նա խոստովանել է, որ նոյեմբերին, գնելու եւ գումարը մաս-մաս վճարելու պայմանով, ոմն Ավոյից խաբեությամբ վերցրել է «Հունդայի» եւ «ՎԱԶ-2107» մակնիշի ավտոմեքենաներ, որոնք հաջորդ օրը ինքնարժեքից անհամեմատ ցածր գնով վաճառել է այլ անձանց:

Ոստիկանության լրատվության վարչությունից հայտնում են, թե նույն ամսին ոմն Աշոտից վերցրել է «ՎԱԶ-2107», ոմն Գեւորից` «ԳԱԶ-3110», ոմն Սուրոյից` «ՎԱԶ-2107» մակնիշի ավտոմեքենաներ, որոնց գազի բալոնները եւ ձայնարկիչները վաճառելուց հետո ավտոմեքենաները, դարձյալ ինքնարժեքից ցածր գներով, վաճառել է այլ անձանց: Նույն ձեւով մի տաքսի ծառայությունից վերցրել է «Ռենո» մակնիշի ավտոմեքենա, որի գազի բալոնը վաճառել է այլ անձի:

Դեկտեմբերի 17-ին, ժամը 21.00-ին, 1955 թ. ծնված Սամվել Ե.-ն ոստիկանությունում հաղորդում է տվել, որ նոյեմբերի 21-ին Գարիկ Ե.-ն իրեն պատկանող «Հունդայի» եւ «ՎԱԶ-2106» մակնիշի ավտոմեքենաները գնելու պատրվակով, մեկ շաբաթվա ընթացքում 65.000 դրամ գումար վճարելու պայմանով, իր տան դիմացից, առանց իր գիտության եւ համաձայնության, վերցրել եւ մի քանի օր անց ավտոմեքենաները վաճառել է այլ անձանց` պատճառելով 8.500 դոլարի նյութական վնաս:

Ձեռնարկվում են միջոցառումներ Գարիկ Ե.-ի արարքներից տուժած անձանց հայտնաբերելու ուղղությամբ:

Կատարվում է հետաքննություն: