2014թ.-ի փետրվար ամսվա կենսաթոշակների վճարման գործընթացը կսկսվի 2014 թվականի փետրվարի 4-ին: Այս մասին NEWS.am-ի թղթակցի հետ զրույցում հայտնեց Սոցիալական ապահովության պետական ծառայություն մամլո քարտուղար Արամայիս Շահբեկյանը՝ անդրադառնալով խոսակցություններին, թե Ամանորի տոների ոչ աշխատանքային օրերի հետ կապված հնարավոր է թոշակներն ուշանան:

Նա նշեց, որ կենսաթոշակների վճարումը չի ուշանում, դրանք, ինչպես միշտ կսկսեն բաժանվել ամսվա երրորդ աշխատանքային օրը:

Հիշեցնենք, որ  հաշվի առնելով, որ 2014 թվականի հունվարի 1-ից բարձրացել է կենսաթոշակների չափը, ՀՀ կառավարության 2014թ. հունվարի 30-ի նիստում ընդունվել է  որոշում, որով  սահմանվել է, որ ընտանիքների անապահովության գնահատման համակարգում` 2014 թվականի ընթացքում ընտանիքների անապահովության գնահատման ժամանակ ընտանիքի ամբողջական եկամտի կազմում հաշվի է առնվում 2013 թվականի դեկտեմբերի դրությամբ հաշվառված կենսաթոշակառուների՝  2013 թվականի դեկտեմբերի 31-ի դրությամբ հաշվարկված կենսաթոշակի չափը: Ինչը նշանակում է, որ կենսաթոշակի բարձրացումը ընտանեկան նպաստ ստացող կենսաթոշակառուների նպաստի իրավունքի վրա չի ազդի:

Նշենք, որ հունվարին որոշ մարզերում ուշացրել են ընտանեկան նպաստների տրամադրումը: