նախընտրելի դարձնել2013 թվականի դեկտեմբերի 14-ից հանրապետությունում սկսվեց ջերմաստիճանի նվազումը եւ արդեն տարվա վերջին օրերին Արարատյան հարթավայրում գրանցվեցին ամենացածր ջերմաստիճանները՝ 16-20 աստիճան զրոյից ցածր, իսկ հանրապետության մյուս տարածաշրջաններում դիտվեց տարվա տվյալ ժամանակահատվածին բնորոշ ջերմաստիճանային ռեժիմ:
Գյուղնախարարությունից հայտնում են, թե այսօրվա դրությամբ դեռեւս վաղ է ցածր ջերմաստիճանների հետեւանքով գյուղատնտեսական մշակաբույսերի ցանքերի եւ բազմամյա տնկարկների հնարավոր վնասների վերաբերյալ ընդանրացումներ անել եւ տալ գնահատականներ: Սակայն, միանշանակ կարելի է պնդել, որ հանրապետության հիմնական հացահատիկացան տարածաշրջաններում աշնանացան ցորենի ցանքերը չեն տուժել, քանի որ ցածր ջերմաստիճաների պայմաններում ծածկված են եղել ձյան կայուն շերտով:
Արարատյան հարթավայրում եւ նախալեռնային գոտում խաղողի ծածկված այգիների (որտեղ խնամքով կատարվել է այգեթաղ) վազերը բացարձակապես չեն վնասվել: Չեն վնասվել նաեւ չթաղված ցրտադիմացկուն (Մեղրաբույր, Չարենցի, Ներկառատ եւ այլն ) սորտերի վազերը: Նախարարության մասնագետները մտահոգություն ունեն , որ չթաղված խաղողի սեղանի եւ մի շարք տեխնիկական սորտերի բերքատու մատերի կենտրոնական (գլխավոր) աչքերը կարող են այս կամ այն չափով վնասված լինել: Չի բացառվում նաեւվնասների հնարավորությունը կարկտահարված դեղձենու եւ կեռասենու այգիներում:
Վերջնական արդյունքները պարզ կդառնան մարտի կեսերին, երբ խաղողի վազերի եւ պտղատու ծառերի մոտ կսկսվի ակտիվ հյութաշարժը:
Այդ կապակցությամբ կներկայացվի համապատասխան տեղեկատվություն:
