Արեւմտամետ ՀԿ-ները  ԿԳՆ-ին չեն ստիպի հանել ցածր դասարաններում դասավանդվող  քրիստոնեական բարոյախոսության դասերը, մայիսի 21-ին խորհրդարանում հայտարարել է ԿԳ նախարար Արմեն Աշոտյանը:

Ըստ նրա, համաձայն նախարարության վերլուծության, դրա դեմ բողոքում են հայկական արմատներ չունեցող, բայց արեւմտյան մոդայիկ տենդենցների լծակներով ֆինանսավորվող անձինք:

Աշոտյանը հավելել է, որ նախարարությունը չի ընկրկի: «Եկեղեցու պատմությունը մեր ազգի պատմության  անքակտելի մասն է: Այն ուսումնասիրել, նշանակում է ամրապնդել մեր երեխաների հայրենասիրական դաստիարակությունը: Այդ պատճառով էլ մենք սկսել ենք ցածր դասարաններից,  որտեղ 3 հազար աշակերտ արդեն անցնում են քրիստոնեական բարոյախոսություն»:

Ըստ նրա՝ միջազգային կազմակերպություններն ավելի լավ է ուշադրություն դարձնեն հարեւան երկրի  դպրոցական դասագրքերին: «Այլատյացությունը դպրոց ընդունվելու առաջին իսկ տարիներից մեզ մոտ չի քարոզվում:  Պարզապես մի քանի հարեւան երկրներում զարգացած քաղաքացիական հասարակություն չկա, որն այդ մասին հայտարարի:  Իսկ մենք ունենք, եւ փորձում են արհեստական հարցեր ստեղծել:  Ես գիտեմ՝ ով է դա արել եւ որքան  գումար ստացել դրա համար:  Սակայն մենք չենք ցանկանում նրանց հարցն օրակարգում հնչեցնել եւ  ձեզ էլ խնդրում ենք նույնն անել», - ընդգծել է նախարարը: