Հայաստանի ԱԻՆ փրկարար ծառայությունն, այսօր՝ հուլիսի 14-ին, Օպերայի եւ բալետի ազգային ակադեմիական թատրոնի շենքում անցկացրեց խոշոր ուսումնավարժություն` «Հրդեհների մարումը մշակութահանդիսարանային կազմակերպություններում» թեմայով:

Օպերայի շենքում ուսումնական հրդեհի մասին ծանուցում ստանալուց անմիջապես հետո ԱԻՆ ՓԾ փրկարար ուժերի վարչության կարեւորագույն օբյեկտների պահպանության բաժնի հրշեջ հրահանգիչները եւ հրշեջ-փրկարարական ջոկատներն անմիջապես ժամանեցին դեպքի վայր եւ սկսեցին իրականացնել ուսումնական պլանով նախատեսված միջոցառումները: Սկսվեց շենքի անձնակազմի տարհանումը, տուժածներին ցուցաբերվեց բժշկական օգնություն: Հրշեջ-փրկարարները շատ արագ բացազատեցին հրդեհաշիջման աշխատանքների համար նախատեսված գործիքները շենքում ու դրան հարակից տարածքում եւ անցան հրդեհաշիջման աշխատանքներին:

Հրդեհի մարման աշխատանքների ժամանակ հրշեջ-փրկարարները օգտվեցին նաեւ շենքին հարակից տարածքում գործող ջրամատակարարման համար նախատեսված հորատանցքից, որը հնարավորություն տվեց հրդեհի վայրում ապահովել ինտենսիվ ջրամատակարարում: Բարձր հարկերից տուժածներին հրշեջ-փրկարարները իջեցրեցին հատուկ պարանների օգնությամբ: Դեպքի վայրում գործում էր հրդեհաշիջման շտաբ, որը համակարգում էր հրդեհի մարման ողջ գործընթացը:

Ուսումնավարժության հիմնական նպատակն էր կատարելագործել հրդեհաշիջման առկա փորձը, հաշվի առնելով նաեւ մշակութահանդիսարանային կազմակերպություններում հրդեհի մարման առանձնահատկությունները: Վարժանքի ընթացքին հետեւում էր ԱԻՆ փրկարար ծառայության տնօրենի տեղակալ, փ/ծ գեներալ-մայոր Վրեժ Գաբիելյանը:

ԱԻՆ ՓՈՒՎ պետ, փ/ծ գնդապետ Պավել Գյոզալյանը ուսումնական վարժանքից հետո ՓԾ տնօրենի տեղակալ Վ. Գաբիելյանին զեկուցեց ուսումնավարժանքի ավարտի մասին:

Ուսումնավարժանքի արդյունքում հաջողությամբ իրականացվեցին ուսումնական պլանով նախատեսված հրդեհաշիջման եւ փրկարարական բոլոր աշխատանքները։