Վարչապետ Հովիկ Աբրահամյանը Երեւանի Կարեն Դեմիրճյանի անվան մարզահամերգային համալիրում մասնակցել է Ուսանողության միջազգային օրվան նվիրված տոնական միջոցառմանը: Կառավարության ղեկավարը շնորհավորել է ուսանողներին տոնական օրվա առթիվ եւ նշել.

«Շնորհավորում եմ ձեզ Ուսանողության միջազգային տոնի, ինչպես նաեւ օրեր առաջ նշված Երիտասարդության համաշխարհային օրվա կապակցությամբ:

Դուք նախանձելի տարիքում եք, երբ ամեն ինչ դեռ առջեւում է, երբ շատ են երազանքներն ու ծրագրերը: Ես ձեզ համարձակություն եմ մաղթում՝ գնալու ձեր երազանքների ու նպատակների հետեւից: Մի՛ վախեցեք համարձակ նպատակներ դնել, բայց իմացե՛ք, որ դրանց իրականացումը պահանջում է մեծ նվիրում ու աշխատանք:

Ես գրեթե ամեն օր հանդիպում ու զրուցում եմ մեր կամ արտերկրյա գործարարների հետ, ովքեր իրենց բիզնեսն են պատրաստվում ընդլայնել կամ ներդրումներ կատարել Հայաստանում: Գրեթե բոլորի մոտ Հայաստանում աշխատելու մոտիվացիան նույնն է. նրանք բոլորը պնդում են՝ Հայաստանում կարողանում են որակյալ արտադրանք տալ: Սա, իրոք, ճշմարտություն է, որովհետեւ մեր երկրում մարդիկ գիտեն ու սիրում են աշխատել: Գիտեն նվիրված ու ստեղծագործաբար աշխատել:

Այս բնատուր շնորհքը՝ մեր ժողովրդի աշխատասիրությունը, Հայաստանի ամենամեծ հարստություններից մեկն է: Սա նոր չի ի հայտ եկել: Մենք միշտ էլ այդպիսին ենք եղել: Դուք էլ եք այդպիսին, եթե նույնիսկ դեռ չեք գիտակցում այդ մասին: Այլ կերպ լինել չեք կարող. դուք լավ աշխատողներ ու ստեղծողներ եք լինելու, որովհետեւ ձեր ծնողներն ու պապերն են այդպիսին եղել: Բնությունից եք այդպիսին: Հիմա ձեր աշխատասիրությունը պետք է դրսեւորվի ուսման մեջ՝ վաղն արդեն մեր երկիրն ու տնտեսությունն առաջ տանելու հարցում:

Բայց հանկարծ չմտածեք՝ մենք այսպես նստելու ենք սպասենք, թե դուք երբ եք մեծանալու, որ մեր երկրի խնդիրները լուծեք: Նույնիսկ չերազեք: Մինչեւ դուք ամրանաք, մենք բոլորովին այլ երկիր ենք հանձնելու ձեզ: Այսօր մենք բոլոր ուղղություններով ընդլայնում ենք մեր արտադրածն ու ստեղծածն իրացնելու հնարավորությունները, լայն շուկաների հասանելիությունը: Վաղն արդեն նոր արտադրանքն ու ծառայություններն են գալու լրացնեն այդ շուկաներում ներկայանալու մեր ներուժը:

Սիրելի՛ երիտասարդներ

Սերնդափոխությունը բնության օրենքն է: Ամեն սերունդ ունի առաքելություն, որ հաճախ արմատապես տարբեր է նախորդ սերնդի արածից, ապրելակերպից ու գործելակերպից: Բայց շատ բանով նման է, որովհետեւ շարունակություն է: Եղե՛ք արժանի շարունակողը լավ գործերի, ոչ թե գործեք իներցիայով:

Դրա համար պետք է լինել որակապես տարբեր. ավելի ուժեղ եւ՛ հոգեբանորեն, եւ՛ մտավոր ունակություններով: Ապրե՛ք ձեր ժամանակի մեջ՝ ձե՛ր ժամանակի չափանիշներով: Համարձակորեն դեմ գնացեք իրենց դարն ապրած ավանդույթներին:

Երբ մենք ուշադիր նայում ենք, թե տարբեր ժամանակներում ու երկրներում ինչ առիթներով են երիտասարդները եւ ուսանողները ելնում պայքարի, թե ինչ հողի վրա են բախվում հայրերի ու որդիների սերունդները, ապա մեկ բառով կարելի է ասել, որ դա պայքար է հանուն արդարության:

Այո՛, արդարությունն ինչ-որ տեղ վերացական բառ է, բայց շատ որոշակի է տարբեր սերունդների ընկալումների մեջ: Փորձեք հասարակությանը պարտադրել արդարության ձեր ընկալումը թե՛ մասնագիտության մեջ, թե՛ մնացած բոլոր ասպարեզներում: Բայց փորձեք դա անել՝ դիմացինին լսելով:

Սա կարեւոր է, որովհետեւ նախ եւ առաջ տեսնել եւ լսել չցանկացողների բանավեճերն արդյունավետ չեն: Եվ երկրորդ. ոչ քիչ երկրներ են կործանվել եւ տասնամյակներով հետ շպրտվել իրենց զարգացման ճանապարհից հենց այն պատճառով, որ փորձել են արդարություն պարտադրել՝ միմյանց չլսելով:

Համոզե՛ք, քարոզե՛ք, բարձրաձայնե՛ք այն, ինչը դուք ճիշտ եք համարում, որովհետեւ վաղը դուք եւ ձեր երեխաներն ապրելու եք այն միջավայրում, որն ինքներդ այսօր ձեւավորում եք: Փոփոխությունների ծարավ ու ակտիվ երիտասարդները գլխացավանք չեն, ճիշտ հակառակը՝ նրանց գոյությունը բնության օրենքն է, զարգացման հիմնական խթաններից մեկը: Ավելին՝ փոփոխությունների ծարավ ու ակտիվ երիտասարդները համակրելի են՝ ի տարբերություն հեղափոխական ծերունիների»: