նախընտրելի դարձնել«Այբ» ավագ դպրոցի նախաձեռնությամբ դեկտեմբերի 14-ին դպրոցում կայացել է «Hour of Code» միջազգային միջոցառումը: Հայաստանում միջոցառումն անցկացվել է առաջին անգամ՝ ՎիվաՍել-ՄՏՍ-ի, Ինֆորմացիոն տեխնոլոգիաների ձեռնարկությունների միության եւ «Microsoft ընկերության աջակցությամբ:
«Hour of Code» միջազգային միջոցառումը համախմբում է ավելի քան 100 միլիոն մասնակցի՝ 180 երկրից: Շուրջ 45 հազար դպրոց մասնակցություն է ունենում այս համընդհանուր միջոցառմանը: Այն մեկ հարկի տակ է հավաքում տեխնոլոգիայի, խաղերի եւ ծրագրավորման սիրահարներին: Միջոցառումը հնարավորություն է տալիս սովորելու ծրագրավորման տարբեր լեզուների եւ մոտեցումների հիմունքները: Ծրագրավորման լեզուների իմացությունը պարտադիր պայման չէ «Hour of Code» միջոցառմանը մասնակցելու համար:
Միջազգային միջոցառման կազմակերպման գաղափարը բխում է այն համոզմունքից, որ յուրաքանչյուր աշակերտ պետք է ունենա համակարգչային գիտելիքներ ձեռք բերելու հնարավորություն: Դա օգնում է զարգացնել տրամաբանությունը, նորարարությունը եւ խնդիրների լուծման հմտությունները: Սկսելով իրենց համակարգչային ուսուցումը վաղ տարիքում՝ աշակերտները կառուցում են ճանապարհ դեպի ապագա մասնագիտական հաջողություն՝ իրենց նախընտրած ոլորտում: Միջոցառմանը մասնակցելու միակ պահանջն անգլերեն հաղորդակցվելու կարողությունն է եւ նոթբուքի կամ պլանշետային համակարգչի առկայությունը: Տարրական դպրոցի աշակերտները նույնպես հետաքրքրություն են ցուցաբերել միջոցառման նկատմամբ:
«Hour of Code» միջոցառումը բաց է բոլոր ցանկացողների համար, բայց քարոզարշավի գլխավոր նպատակն է, որ տասնյակ միլիոնավոր աշակերտներ մասնակցեն միջոցառմանը դեկտեմբերի 8-ից 14-ն ընկած ժամանակահատվածում՝ համակարգչագիտության ուսուցման շաբաթվա ընթացքում:
ՎիվաՍել-ՄՏՍ-ն աջակցություն է ցուցաբերել Հայաստանում «Hour of Code» անդրանիկ միջոցառման իրականացմանը՝ ելնելով այն համոզմունքից, որ դպրոցական տարիներին ստացած գիտելիքները պահպանվում են ամբողջ կյանքի ընթացքում: Կրթական ծրագրերին նոր որակ հաղորդելու հարցում ընկերության պատրաստակամությունն ունի կարեւոր նպատակ՝ խթանել նորը բացահայտելու եւ ստեղծելու ցանկությունը ծրագրավորմամբ հետաքրքրվող աշակերտների շրջանում:
