նախընտրելի դարձնել
ԲՀԿ առաջնորդ Գագիկ Ծառուկյանին պատգամավորական մադատից զրկելու հարցը քննարկվելու է Ազգային ժողովում: Այս մասին այսօր` փետրվարի 12-ին, ՀՀԿ խորհրդի նիստից հետո լրագրողների հետ զրույցում ասաց ՀՀԿ խմբակցության քարտուղար Գագիկ Մելիքյանը:
«Այդ հարցը անպայման քննարկման առարկա է լինելու, այդ մասին խոսեց նաեւ Ազգային ժողովի նախագահը՝ ընդունելով իր մեղքը, որ ժամանակին դա չի արել»,- ասաց Գագիկ Մելիքյանը:
Գագիկ Մելիքյանի խոսքով՝ ՀՀ նախագահ Սերժ Սարգսյանի ելույթով «իր տեղը դրվեց այն, ինչ կատարվում է Հայաստանի Հանրապետությունում»:
«Ելույթով իրերն սկսեցին իրենց անունով կոչվել: Այսինքն՝ թալանչին չի կարող բարերար լինել: Իրական հարկային դաշտում աշխատող որեւէ գործարար չի կարող այդպիսի բարեգործություններ իրականացնել ու նման հարստություն դիզել»,- ասաց Գագիկ Մելիքյանը:
Նշենք, որ նախագահ ՍերԺ Սարգսյանը փետրվարի 12-ին ՀՀԿ խորհրդի նիստում ունեցած ելույթի ժամանակ հայտարարել էր, որ Գագիկ Ծառուկյան քաղաքական դերակատարը երկրի համար դարձել է չարիք։ Նա նաեւ Ծառուկյանին ազատել է Ազգային անվտանգության խորհրդի անդամի կարգավիճակից, խոստացել, որ գործընթաց է սկսվելու Ծառուկյանի՝ ԱԺ նիստերից պարբերաբար բացակայելու կապակցությամբ:
