նախընտրելի դարձնելՀայաստանի եւ Ռուսաստանի միջեւ ռազմատեխնիկական համագործակցության հետագա զարգացման նպատակով եռօրյա այցով Հայաստան է ժամանել Ռուսաստանի ռազմատեխնիկական համագործակցության դաշնային ծառայության տնօրենի տեղակալ Կոնստանտին Բիրյուլինի գլխավորած պատվիրակությունը:
Ինչպես NEWS.am-ը տեղեկանում է Ազգային անվտանգության խորհրդի քարտուղարի մամուլի գրասենյակից, հուլիսի 19-ին պատվիրակությանն ընդունել է ԱԱԽ քարտուղար Արթուր Բաղդասարյանը: Հանդիպմանը մասնակցել են նաեւ ՀԱՊԿ գլխավոր քարտուղարի տեղակալ Վալերի Սեմերիկովը, ՀԱՊԿ Ռազմատնտեսական համագործակցության միջպետական հանձնաժողովին կից Գործարար խորհրդի նախագահ Ալեքսանդր Նոզդրաչեւը, ինչպես նաեւ` Ռուսաստանի ռազմաարդյունաբերական համալիրի` մեկ տասնյակից ավելի առաջատար ձեռնարկությունների ղեկավարներ:
Հանդիպման ընթացքում քննարկվել են ռազմաարդյունաբերական համալիրի զարգացման, Հայաստանի եւ Ռուսաստանի միջեւ ռազմատեխնիկական համագործակցության շրջանակում համատեղ ձեռնարկությունների ստեղծման հարցերը:
Մատնանշելով վերջին տարիներին հաջողությամբ գործող ռուս-բելառուսական Պաշտպանական համակարգեր միջպետական ֆինանսաարդյունաբերական խմբի գործունեությունը` Արթուր Բաղդասարյանը կարեւորել է Հայաստանի ռազմաարդյունաբերական համալիրի ձեռնարկությունների ընդգրկման հնարավորությունը նշված խմբի ձեռնարկությունների կազմում: Քննարկվել են այդ գործընթացի հետ կապված ընթացակարգերը, ինչպես նաեւ` երկու պետությունների ռազմատեխնիկական ոլորտը կարգավորող նորմատիվ բազայի հնարավոր ներդաշնակեցման հարցը:
Հանդիպումից հետո Արթուր Բաղդասարյանը պատվիրակության հետ մեկնել է Գյումրիի ավիացիոն բազա, Վանաձորի «Սլացք» եւ «Ավտոգեն» ձեռնարկություններ: Պատվիրակությունն այցելել է նաեւ Չարենցավանի հաստոցաշինական գործարան, Հրազդանի «Պատնեշ» ձեռնարկություններ, ուսումնասիրել դրանց հզորությունները: Երկու երկրների ձեռնարկությունների ղեկավարները քննարկել են ռազմատեխնիկական ոլորտում երկկողմ համագործակցության հնարավորությունները:
ՀԱՊԿ հավաքական անվտանգության խորհրդի հունիսյան նստաշրջանի միջոցառումների պլանի իրագործման հարցերի քննարկումը նախատեսվում է հուլիսի 20-ին: Այդ նպատակով Հայաստան է ժամանել ՀԱՊԿ գլխավոր քարտուղար Նիկոլայ Բորդյուժայի գլխավորած պատվիրակությունը:
