Գերմանիան վերջնական նախազգուշացումն է արել Հունաստանին՝ պահանջելով լուծել վարկատուների հետ խնդիրը: Եթե դա տեղի չունենա, Հունաստանը ստիպված կլինի լքել եվրոգոտին եւ վերադառնալ իր ազգային արժույթին: Այս մասին գրում է The Sunday Times-ը:

Եվրոպայի խորհրդի ղեկավար Դոնալդ Տուսկը նաեւ կարծիք է հայտնել, որ ժամանակն է դադարեցնել մեղավորներ փնտրելու արշավը:

Գերմանիայի կանցլեր Անգելա Մերկելի աշխատակազմի աղբյուրի տեղեկացմամբ, հունական բանակցությունների վերջնաժամկետները չեն փոփոխվելու:

Հունաստանի հետ վերջնական բանակցությունները նախանշված են հունիսի 30-ին, ինչից հետո, համաձայնություն ձեռք չբերելու դեպքում, երկրի փողերը կավարտվեն, եւ Աթենքն ի վիճակի չի լինի վճարել պարտքերը կամ ֆինանսավորել պետության ղեկավարումը:

Ըստ Gazeta.ru-ի, ավելի վաղ Հունաստանի ֆինանսների նախարար Յանիս Վարուֆակիսը եվրոխմբի նիստի արդյունքներով հայտարարել էր, որ «հզոր ազդակ է ուղարկել» հանդիպման մասնակիցներին, որը «վերջ կդնի հունական դրամային»: