«Ընդդեմ իրավական կամայականության» ՀԿ-ն դատապարտում է Ոստիկանության անհամաչափ գործողությունները:

Կազմակերպության տարածած հաղորդագրության մեջ նշվում է.

«Հունիսի 23-ի առավոտյան Ոստիկանությունը Բաղրամյան պողոտայից կոպտորեն ցրեց խաղաղ ցուցարարներին, ովքեր նստացույց էին կազմակերպել էլեկտրաէներգիայի թանկացման դեմ:

Ոստիկանները ջրցան մեքենաներով շարժվեցին ցուցարարների դեմ ժամը 5.30-ի սահմաններում եւ սկսեցին տապալել նրանց: Դրանից հետո ոստիկանները սկսեցին տարբեր կողմերից հրել նստացույցի մասնակիցներին եւ բռնի ուժով տեղահանել:

Ցուցարարների նկատմամբ կիրառված այս անտեղի եւ ոչ համարժեք ուժը հստակ կամայականություն է խաղաղ հավաքների ազատության իրավունքի նկատմամբ, որը սահմանված է ՀՀ Սահմանադրությամբ եւ միջազգային իրավունքի նորմերով:

Ոստիկանների կողմից իրականացված չարաշահումները հաստատվում են բազմաթիվ տեսանյութերով, որոնք տեղադրվել են համացանցում եւ ցույց են տալիս, թե ինչպես են նրանք հարվածում, հետապնդում եւ հաճախ էլ քարշ տալիս խաղաղ ցուցարարներին: Լրագրողները եւս հարձակման են ենթարկվել, նրանց տեսախցիկները ջարդվել են` չնայած հայտարարում էին ոստիկաններին իրենց մասնագիտական պարտականությունների կատարման մասին:

Պաշտոնական տվյալների համաձայն` 237 անձ Երեւանում, Աբովյանում եւ Աշտարակում ձերբակալված է եղել, իսկ հետագայում ազատ է արձակվել: Տասնյակ անձիք ստացել են մարմնական վնասվածքներ:

Տեղեկատվություն է տարածվել նաեւ անհայտ ոստիկանների կողմից առանց պատշաճ ներկայացուցչի (փաստաբանի) հարցաքննված ակտիվիստների եւ կատարվածը «խուլիգանություն» որակելու վերաբերյալ:

Այսպիսի անօրինական հարցաքննությունը չի կարող ճանաչվել որպես պատշաճ քննություն: Բացի այդ, ցուցարարների ճնշող մեծամասնությունը իրապես խաղաղ էր, եւ այն հայտարարությունը, որ նրանք դատապարտվելու են խուլիգանության համար, զուրկ է իրավական եւ փաստական հիմքերից: Բացի այդ, տեղյակ ենք, որ ակտիվիստները առանց բավարար հիմքերի եւ ենթարկվում են փորձաքննության` թմրանյութի եւ ալկոհոլի առկայությունը ստուգելու նպատակով:

ԸԻԿ-ը խիստ դատապարտում է ոստիկանների ծայրահեղ չարաշահումները` ի պատասխան քաղաքացիների խաղաղ անհամաձայնությանը:

Մենք կոչ ենք անում պաշտոնատար անձանց երաշխավորել, որ ցույցի խաղաղ մասնակիցները չեն ենթարկվելու հետապնդումների: Հավաքների ազատության իրենց իրավունքի եւ քաղաքացիական անհամաձայնությունն արտահայտելու համար ձերբակալված անձանց մենք համարում են «խղճի դատապարտյալներ»:

Մենք նաեւ կոչ ենք անում պետական մարմիններին` իրականացնել պատշաճ քննություն ոստիկանների կողմից իրենց իշխանությունը գերազանցելու դեպքերի նկատմամբ եւ պատասխանատվության ենթարկել նրանց: