Նախընտրելի
«Հայաստանի էլեկտրական ցանցեր» ՓԲԸ-ում աուդիտը կսկսվի մինչեւ սեպտեմբեր, եթե ոչ օգոստոսին, իսկ այժմ դիտարկվում են հոսանքի գնի բարձրացման 7 դրամը վճարելու աղբյուրները: Այս մասին NEWS.am-ի թղթակցի հետ զրույցում ասաց Կառավարության աշխատակազմի ղեկավար-նախարար Դավիթ Հարությունյանը: Ներկայացնում ենք նրա հետ մեր հարցազրույցը:
Պարոն Հարությունյան, վարչապետը նշել է, որ սակագնի 7 դրամով բարձրացման տարբերությունը չի վճարվելու բյուջեից եւ արդեն վճարման աղբյուրները նշմարվում են: Կարո՞ղ էիք մի փոքր բացել փակագծերը: Որտեղի՞ց կարող են վճարվել այդ գումարները:
Դեռեւս վաղ է փակագծերը բացելը, աշխատանքները տարվում են եւ անընդհատ որոնվում են այլ, նաեւ՝ այլընտրանքային աղբյուրներ: Այնպես որ դեռեւս վաղ է այդ մասին խոսելը:
Ասվում էր, թե դա կարող է վճարվել մասնավոր նվիրատվություններից, արտաբյուջտեային միջոցներից:
Մենք տարբեր տարբերակներ ենք դիտարկում:
Պարոն Հարությունյան, նշվում էր, թե խոսքը 23,4մլրդ դրամի մասին է: Ճի՞շտ է:
Ոչ, տարեկան 30,5 մլրդ դրամի մասին է խոսքը:
Ասել էիք, որ աուդիտը կտեւի 3-6 ամիս: Իսկ ե՞րբ է նախատեսվում սկսել այն:
Այս պահին աշխատում ենք, որպեզի ձեւակերպենք հարցերը, որոնք պետք է բարձրացվեն աուդիտի և խորհրդատու ընկերության առջեւ: Կարծում եմ՝ աշխատանքները կսկսվեն մինչեւ սեպտեմբեր, եթե ոչ օգոստոսին:
Պարոն Հարությունյան, ամեն դեպքում տեսականորեն ի՞նչ աղբյուրներից կարող է վճարված հոսանքի բարձրացման դիամց:
Կան բյուջետային ու ոչ բյուջետային աղբյուրներ:
Եթե հայտարարվել է, որ բյուջետայինից չի լինելու, կարելի՞ է եզրակացանել, որ արտաբյուջետայինից կլինի:
Ճիշտ է ասել ոչ բյուջետային, դա ավելի լայն հասկացություն է, քան արտաբյուջետայինը: Արտաբյուջետայինը դրանք այն աղբյուրներն են, որոնք ձեւավորվում են վճարովի ծառայությունների արդյունքում պետական կազմակերպությունների կողմից, իսկ ոչ բյուջետային միջոցների մեջ կարող են մտնել նաեւ մասնավոր միջոցները:
Այսինքն՝ հնարավո՞ր է տարբերակ քննարկվի, որ գործարարները նվիրատվություն անեն:
Ես ոչինչ չեմ ցանկանում բացառել, դիտարկվում են տարբեր տարբերակներ:
Պարոն Հարությունյան, արտաբյուջետային միջոցները ե՞ւս կարող են քննարկման առարկա լինել:
Ես դա քիչ հավանական եմ համարում: Ենթադրում եմ, որ այլ լուծում կլինի: Համենայն դեպս մինչեւ սեպտեմբերի 1-ը պետք է լուծում գտնվի, այդ ժամանակ արդեն վճարում պետք է անենք:
Զրուցեց՝ Ինգա Մարտինյանը
