Ռոտենբերգների ընտանիքը, որը Forbes-ի ցուցակի երեք մասնակցի է ընդգրկում` Արկադի Ռոտենբերգին (60-րդ տեղը, ըստ ամսագրի), որդուն` Իգորին  (166-րդ տեղը) եւ եղբորը` Բորիսին (99-րդ տեղը) դադարել է գլխավորել Forbes ամսագրի վարկածով Ռուսաստանի ամենահարուստ ընտանիքների աղյուսակը:

Պարբերականը նշում է, որ ընտանիքի դեմ պատժամիջոցների մի տարվա ընթացքում Ռոտենբերգներն ընդհանուր առմամբ 2,6  միլիարդ դոլար են կորցրել, եւ այժմ ընտանիքի կարողությունը գնահատվում է 2,95 միլիարդ դոլար: Անցյալ տարի երեք գործարարի ընդհանուր կարողությունը գնահատվում էր 5,55  միլիարդ դոլար:

Իսկ աղյուսակն այժմ գլխավորում է ԲԻՆ ընկերության տերերի ընտանիքը, մասնավորապես` Միխայիլ Գուցերովը` (38-րդ տեղ), ինչպես նաեւ նրա եղբայրները` Սաիդ-Սալաման (142-րդ տեղ ) եւ Համզաթը, ինչպես նաեւ զարմիկը` Միխայիլ Շիշխանովը (139-րդ տեղ): Անցած տարվա ընթացքում նրանց կարողությունը եւս կրճատվել է, բայց ոչ այնքան զգալիորեն, որքան Ռոտենբերգներինը, ընդամենը 1 միլիարդ դոլարով` հասնելով 3,85 միլիարդ դոլարի: