Չինաստանում պաշտոն զբաղեցնելու համար քննությունների ընթացքում արտագրելը քրեական հանցագործության է հավասարեցված եւ կարող է պատժվել երեքից  յոթ տարվա ազատազրկմամբ:  Այդ մասին ասվում է ՉԺՀ-ի քաղաքացիական ծառայության տարածած շրջաբերականում: 

«Օրենքի համաձայն, քննությունների ժամանակ արտագրողները կարող են դատապարտվել երեքից յոթ տարվա ազատազրկման, վարչական տույժի կամ տուգանքի: Լուրջ դեպքերում օրինախախտները կարող են երեքից  յոթ տարով ազատազրկվել », - ասվում է փաստաթղթում:

Այս տարի պետական կենտրոնական հաստատություններում, դրանց հետ կապված հասարակական կազմակերպություններում եւ իշխանության տեղական մարմիններում  27 հազար նոր աշխատողի կարիք կլինի: Անցյալ տարի թիվն ավելի փոքր էր՝  22 հազար: Ինչպես հաղորդել է «Բեյցզին ժիբաո» թերթը, այս տարի պետական ծառայության ընդունվածների թիվն ամենամեծը կլինի վերջին տասնամյակի ընթացքում:   Նախապատվությունը կտրվի փորձառու աշխատողներին:  Օրինակ, գավառական եւ ավելի բարձր մակարդակի պետական հաստատություններում պաշտոն ստանալ ցանկացողները պիտի ստորին օղակներում երկու տարվա աշխատանքային փորձ ունենան, տեղեկացնում է ՏԱՍՍ-ը:  

Պահանջները մի քիչ մեղմված են հեռավոր ներքին շրջանների համար, որտեղ կրթության, աշխատանքային փորձի եւ տարիքի վերաբերյալ առաջադրվող պահանջներն այնքան խիստ չեն: 

ՉԺՀ-ում պետական պաշտոնյաների փոխարինման քննություններն անցկացվում են  հոկտեմբերի  15-ից մինչեւ 24-ը: