նախընտրելի դարձնել
Superjob.ru հետազոտական պորտալի փորձագետները պարզել են, թե ռուսաստանցիներից ով է ուրիշներից ավելի երկար մնում աշխատանքի վայրում:
Հարցմանը մասնակցածների 26 տոկոսի կարծիքով իրենց համար բնական է այն իրավիճակը, երբ համարյա ամեն օր սովորականից երկար են մնում աշխատավայրում: Մասնակիցների 21 տոկոսը աշխատաժամի ավարտից հետո աշխատավայրում մնում է շաբաթը մի քանի անգամ, եւս 21 տոկոսը՝ ամիսը մի քանի անգամ, 12 տոկոսը՝ տարին մի քանի անգամ: Աշխատողների 14 տոկոսը երբեք պահանջվածից երկար չի մնում աշխատավայրում:
Այն աշխատողների թվում, որոնք գրեթե ամեն օր ստիպված են աշխատաժամի ավարտից հետո մնալ աշխատավայրում, ամենից մեծ թիվ են կազմում 25-ից 34 տարեկան ռուսաստանցիները եւ մարդիկ, որոնք ամիսը 45 հազար ռուբլուց բարձր են ստանում, համապատասխանաբար՝ 29 տոկոսը եւ 31 տոկոսը:
Նշվում է, որ տղամարդիկ աշխատավայրում ավելի հաճախ են մնում, քան տղամարդիկ: 29%-ը համարյա ամեն օր է մնում աշխատավայրում, 23%-ը՝ շաբաթը մի քանի անգամ: Կանանց մոտ այդ ցուցիչը կազմում է համապատասխանաբար 23% եւ 19%: Աշխատավայրում երբեք երկար չի մնում տղամարդկանց 11%-ը եւ կանանց 16%-ը, տեղեկացնում է Գազետան:
«Ամենից հաճախ ամուսնացած տղամարդիկ են ստիպված լինում մնալ աշխատավայրում (34%) եւ երեխա ունեցող տղամարդիկ (35%)», – ասվում է հաղորդագրության մեջ: Երեխա ունեցող կանայք ավելի հաճախ են ստիպված երկար մնալ աշխատավայրում, քան երեխա չունեցողները, համապատասխանաբար՝ 26% եւ 20%:
Ռուսաստանցիների 59%-ի խոսքով, իրենք համամիտ են «Կարելի է երբեմն երկար մնալ, բայց լավ է դա կյանքի նորմ չդարձնել» սկզբունքին: Ամեն երրորդը համարում է, որ անհրաժեշտ է ժամանակին դուրս գալ աշխատավայրից եւ հասցնել ամեն ինչն անել աշխատաժամի ընթացքում: 8%-ի կարծիքով աշխատանքը կյանքի շատ կարեւոր մասն է եւ անհրաժեշտ է աշխատանքից հետո երկար մնալ եւ/կամ տանը շարունակել գործը:
Հետազոտությանը ռուսական բոլոր շրջաններից 1,6 հազար մարդ է մասնակցել:
