Բաշկիրիայի Սալավաթ քաղաքում հրազենային վիրավորում ստացած Աբրահամ Ավագյանի վիճակը ծանր է: Այս մասին NEWS.am-ի թղթակցի հետ զրույցում ասել է Ռուսաստանի  հայերի միության  Բաշկիրիայի շրջանային բաժանմունքի նախագահ Արկադի Դալարյանը:

Նշենք, որ Աբրահամ Ավագյանը դեռ վերակենդանացման բաժանմունքում է: Դալարյանի խոսքով՝ նոյեմբերի 7-ին նրան պետք է 5-րդ անգամ վիրահատեին, սակայն չեն արել: «Միգուցե նոյեմբերի 8-ին անեն: 28-ամյա Ալբերտ Ակուլյանը, որն անցյալ շաբաթ բոլորից ծանր վիճակում էր գտնվում, ապաքինվում է, անգամ հնարավոր է, որ նրան եկող շաբաթ դուրս գրեն: Մեսրոպ Մալոմյանը, որը նույնպես վերակենդանացման բաժանմունքում է, նույնպես նորմալ վիճակում է»,- ասել է Դալարյանը:

Ռուսաստանի  հայերի միության  Բաշկիրիայի շրջանային բաժանմունքի նախագահը նաեւ հավելել է, որ այս պահին ձերբակալված են 3 կասկածյալ, իսկ 5-ը փախուստի մեջ են: «Ցավոք սրտի, նախկինում դատված ադրբեջանցուն դեռ չի հաջողվել ձերբակալել: Բաշկիրիայի իրավապահները շահագրգռված են գործը բացահայտելու հարցում»,- ընդգծել է Արկադի Դալարյանը:

Հիշեցնենք, որ Սալավաթ քաղաքում քրեական ողբերգություն էր տեղի ունեցել այս տարվա հոկտեմբերի  29-ի գիշերը։ Դիմակավոր մարդկանց խումբը  (8 մարդ) Հյուսիսային փողոցում մեքենայով մոտեցել էր ավտոսերվիսին եւ կրակել յոթ մարդու ուղղությամբ։ Հայտնի է, որ հարձակվողներից մեկը նախկինում դատված Նագիմ Շաքիրօղլի Մամեդով անունով  34-ամյա ադրբեջանցին է, որը եղել է իր ընկերների հետ։  Տուժածներն են՝ Ա. Ոսկայան, Տ. Ոսկանյան, Ս. Գրիգորյան, Մ. Մալոմյան   (վերակենդանացման բաժանմունքում է), Ա. Ավետյան(վերակենդանացման բաժանմունքում է),  Ա. Ակուլյան (վերակենդանացման բաժանմունքում է)։  Ավտոսերվիսի տերը 35-ամյա Արթուր Սարգսյանը մահացել է Սալավաթի քաղաքային հիվանդանոցում գլխի մասում հրազենային վնասվածքից։