նախընտրելի դարձնելՀՀ առողջապահության նախարարությունը հայտարարություն է տարածել, որում խստորեն դատապարտում է Երեւանի շտապօգնության կենտրոնական ենթակայանում փետրվարի 2-ի կեսգիշերն անց բուժաշխատողի հանդեպ բռնության դրսեւորման փաստը:
«Բռնության ցանկացած դրսեւորում ինքնին անընդունելի է, հատկապես, երբ ձեռք է բարձրացվում բուժաշխատողի վրա` անգամ հաշվի չառնելով, որ նրա մասնագիտական օգնությունը տվյալ պահին կարող է անհրաժեշտ լինել մեկ ուրիշին:
Նման արարքները բարոյական մեծ վնաս են հասցնում ոչ միայն բուժանձնակազմին, այլեւ ողջ հասարակությանը` ստեղծելով փոխադարձ անվստահության, անառողջ մթնոլորտ։
Նշենք, որ Երեւանի շտապօգնության կենտրոնական ենթակայանում տեղի ունեցած միջադեպից տուժած 53-ամյա բուժաշխատողը մարմնական վնասվածքներով` այդ թվում ոտքի կոտրվածք, տեղափոխվել է բուժհաստատություն: Նրա բուժօգնությունը, նախարարի հանձնարարությամբ, կկազմակերպվի պետական պատվերի շրջանակում»,-ասված է հայտարարությունում:
Ավելի վաղ NEWS.am-ը հայտնել էր, որ Երեւանում շտապօգնության կենտրոնական ենթակայանում փետրվարի 2-ին ուշագրավ միջադեպ է տեղի ունեցել. կեսգիշերն անց, ժամը 03:00-ի սահմաններում ենթակայան է մտել 30-ամյա մի երիտասարդ ու որոշել մնալ այնտեղ: Երբ աշխատակիցները նրան փորձել են դուրս հրավիրել, վերջինս հարձակվել է բժշկի վրա եւ ծեծի ենթարկել:
Բուժանձնակազմը ստիպված ահազանգել է իրավապահներին, որոնք բերման են ենթարկել Արզուման անունով երիտասարդին: Իսկ բժիշկը մարմնական վնասվածքներով տեղափոխվել է թիվ 1 համալսարանական կլինիկա:
Նշանակվել է դատաբժշկական փորձաքննություն, մանրամասները պարզվում են:
