Այսօր ստեղված է մի վիճակ, երբ ծնողները չեն ուզում իրենց երեխաներին ավագ դպրոց ուղարկել, ինչն անթույլատրելի է: Այս մասին, այսօր՝ փետրվարի 26-ին, առաջին աշխատանքային խորհրդակցության ժամանակ նշել էԿԳ նորանշանակ նախարար Լեւոն Մկրտչյանը:

ԿԳՆ-ից NEWS.am-ին հայտնում են, որ նախարարը խորհրդակցությունը սկսել է հանրապետությունում ընթացող կառավարման ոլորտի բարեփոխումներով պայմանավորված համակարգային նոր մշակույթի կարեւորմամբ.

«Սահմանադրության փոփոխություններից հետո մեր պետությունը թեւակոխել է պետական համակարգի փոփոխությունների ակտիվ փուլ, որն   ենթադրում է կառավարման  ավելի արդյունավետ մշակույթի ներդրում: Հանրապետության նախագահի  վերջին ծրագրային ելույթում շատ հստակ ուղենիշներ դրվեցին առաջիկա տարիների համար: Դա, ըստ էության, Հայաստանի Հանրապետության նոր ծրագրային փաստաթուղթն է, որը դրվելու է մեր աշխատակարգի հիմքում: Կրթական համակարգի ծրագրային բարեփոխումները պետք է իրականացվեն նոր աշխատակարգով: Ովքեր կարող են եւ պատրաստ են այդ աշխատակարգի պահանջով առաջնորդվել կշարունակեն իրենց նպաստը բերել կրթական համակարգի զարգացմանը»,- նշել է Լեւոն Մկրտչյանը,  շեշտելով, որ խորհրդակցության մասնակիցներից շատերը կրթական համակարգում անցել են երկար ճանապարհ եւ ունեն մեծ ներդրում համակարգի ստեղծման գործում:

Նախարարը մեկ անգամ եւս շեշտել է, որ աշխատանքի գնահատման միակ չափանիշը լինելու է պրոֆեսիոնալիզմը. «Դժվարությամբ  իրականացված բարեփոխումների ընթացքում մենք կարողացանք կրթական համակարգի արտաքին տեսքը ստեղծել,  ժամանակն է, որ մտածենք   բարեփոխումների ձեւի մեջ բովանդակություն ներդնելու մասին: Կրթական  հիմնական  բարեփոխումները եղել են  համապատասխանության եւ որակի ծրագրեր: Համապատասխանության խնդիրը, գուցե որոշակի բացթողումներով, սակայն լուծել ենք, այժմ մենք խնդիր ունենք  տարիների ընթացքում ստեղծված բարեփոխումների գործիքակազմին տալ իմաստ, այլապես դրանք կարող են կորցնել իրենց իմաստը»,- նշել է նախարարը` ընդգծելով, որ կրթության  որակի խնդիրը բովանդակային լուրջ աշխատանք  եւ համատեղ ջանքեր է  պահանջում:

Նախարարն առանձին անդրադարձել է կրթության բոլոր աստիճաններին` մանրամասնելով հանրակրթության, միջին մասնագիտական եւ բարձրագույն կրթության ոլորտի խնդիրները: Լ. Մկրտչյանն  այս համատեքստում հատուկ  ընդգծել է  հանրակրթության ոլորտում ավագ դպրոցների, բարձրագույն կրթության ոլորտում մագիստրոսի ծրագրի արդյունավետության բարձրացումը. «Մենք ունենք մի վիճակ, երբ ծնողները չեն ուզում իրենց երեխաներին ավագ դպրոց ուղարկել: Սա անթույլատրելի է: Խնդիր ունենք նաեւ մագիստրատուրայում, մասնավորապես, պետք է հստակեցնենք ինչով են տարբերվում բակալավրի եւ մագիտրոսի կրթական ծրագրերը եւ դրանց համապատասխանությունն աշխատաշուկայի պահանջներին,  այլապես բարձրագույն կրթության աստիճանավորումը կորցնում է իր արժեքը»,-  ընդգծել է Լեւոն Մկրտչյանը` հավելելով, որ որպես ԵՊՀ դասախոս անձամբ է զգացել կրթական բարեփոխումների որոշ հետեւանքները կրթության որակի վրա:

Խորհրդակցության ընթացքում անդրադարձ է եղել նաեւ կրթական համակարգի կառուցվածքային, համակարգի ֆինանսավորմանը,   առանձնացված ստորաբաժանումների աշխատանքին եւ բազմաթիվ այլ հարցերի: