Յոթ տարեկան իսրայելցի Օրի Գրինհուտը Իսրայելի հյուսիսում հնագիտական պեղումների վայրում զբոսնելիս փոքրիկ կավե արձանիկ է հայտնաբերել որը, ինչպես պարզվել է, մոտ   3,5 հազար տարեկան է, հաղորդում է «Ինտերֆաքսը»` վկայակոչելով  «Ջերուզալեմ պոստ» թերթին: 

Թերթի տվյալներով, տղան արձանիկը մայրիկին է նվիրել, սակայն նա որդուն բացատրել է, որ դա հին իր է, այդ պատճառով անհրաժեշտ է այն հանձնել Իսրայելի հնագիտության վարչությանը: Այդ տեսչության աշխատակիցները տղային շնորհակալություն են հայտնել եւ խրախուսել են գտածոյի համար: 

Որոշ հետազոտողների կարծիքով, արձանիկը կարող է պտղաբերության աստվածուհու պատկերը լինել, որը հայտնի է Աստվածաշնչից եւ քանաանյան աղբյուրներից: Դրա պաշտամունքն Իսրայելում հայտնի  էր մթա X-ից VIII դարերում: Աստարտան  Միջագետքի սիրո եւ իշխանության Իշտար աստվածուհու հունական տարատեսակն է: Պաշտամունքի արմատները հասնում են Հին Միջագետքի ժամանակաշրջան, որում սեմական ցեղերը,  շումերների կրոնական ավանդույթներին հաղորդակցվելով, ընդունեցին գլխավոր աստվածությունների կերպարները եւ նրանց ներառեցին իրենց պանթեոնում: