Անհրաժեշտ է արագացնել Հայաստանին վարկով զենքի մատակարարումը: Այդ մասին ապրիլի  15-ին Երեւանում լրագրողներին հայտնել  է ՌԴ Դաշնության խորհրդի Պաշտպանության եւ անվտանգության հարցերով հանձնաժողովի անդամ Ալեքսեյ Կոնդրատեւը Հայաստանի խորհրդարանի Պաշտպանության եւ ազգային անվտանգության հանձնաժողովի ներկայացուցիչների հետ ճեպազրույցի ընթացքում, ամփոփելով Երեւանում համատեղ նիստի արդյունքները: 

«Մենք լսում ենք, որ Ռուսաստանը զենք է մատակարարում Ադրբեջանին: Կվերլուծենք այն, ինչ լսել ենք` հասկանալու, թե ինչու հավասարակշռություն եւ ուժերի հաշվեկշիռ չի առաջանում: Ինչու է զենք մատակարարվում Ադրբեջանին, իսկ Հայաստանին չի մատակարարվել: Ռազմատեխնիկական համագործակցության մասին մեր պայմանավորվածությունները ժամկետներ ունեն, որոնք պետք է կատարել», - հայտնել է Կոնդրատեւը:

«Միաժամանակ անհրաժեշտ է Արցախում  եւ, բնականաբար, Հայաստանում հակամարտությունների վերաբերյալ միասնական մոտեցում մշակել: Պետք է հասկանալ, որ այս տարածաշրջանը ողողված է զենքով` խորհրդային, ռուսաստանյան, այլ երկրների: Խնդիրն է` այնպես անել, որ միջազգային ուժերը հրաժարվեն ընդհանուր առմամբ ուժի կիրառումից», - հավելել է նա: