Ղազախստանի խորհրդարանի սենատի պատգամավոր, Գերագույն դատարանի նախկին ղեկավար Բեկտաս Բեկնազարովը հայտնել է, որ երկրի Քրեական օրենսգրքում պիտի առանձին հոդված լինի հարբած վարորդներին պատժելու համար, հայտնում է  «Ինտերֆաքսը»: 

Սենատի լիագումար նիստին վարչապետի եւ գլխավոր դատախազի անունով պատգամավորական հարցում հնչեցնելով` պատգամավորն ընդգծել է, որ նախկինում անսթափ վարելու համար վարորդական իրավունքից զրկված անձանց նկատմամբ անհրաժեշտ է ավելի խիստ պատիժ կիրառել: 

«Անհրաժեշտ է նման անձանց հանդեպ, հիմնական պատժից բացի, մտածել գուցե հանրային պարսավանքի մասին: Այնտեղ, որտեղ նման պատիժ է կիրառվում, երեւում է  դրա կիրառության արդյունավետությունը», — հայտնել է Բեկնազարովը:

«Արժե էականորեն փոփոխել ՔՕ-ի 14-րդ գլխի նորմերը, որոնք պատասխանատվություն են նախատեսում տրանսպորտային քրեական օրինախախտման համար, առանձին հոդվածով նշել անսթափ վարորդների գործողությունները, որոնց մեղքով  այս կամ այն ՃՏՊ-ն է տեղի ունեցել, այդ հոդվածի համաձայն ավելի խիստ պատասխանատվություն նախատեսել, հատկապես այն դեպքերի համար, որոնք մարդու մահվան են հանգեցրել », — կարծում է սենատորը:

Նրա տվյալների համաձայն, 2014–2015-ին երկրի ճանապարհներին  ՃՏՊ-ներից ավելի քան   55 հազար մարդ է տուժել, ավելի քան 5 հազար մարդ մահացել է: Միաժամանակ, նշել է պատգամավորը, առանձնահատուկ տագնապ է հարուցում հարբած վիճակում կալանված վարորդների թվի նշանակալի աճը: