նախընտրելի դարձնել
Գիտնականները պարզել են, որ ընտանի կենդանիներն առողջություն են բերում իրենց տերերին: Շան հետ զբոսանքներն օգնում են պայքարել ավելորդ քաշի դեմ, ավելի հազվադեպ այցելել բժիշկներին եւ նոր մարդկանց հետ ծանոթանալ, հայտնում է Gazeta-ն` վկայակոչելով The Gerontologist-ին:
«Ստացված արդյունքները բժիշկներին հիմք են տալիս իրենց տարեց հիվանդներին խորհուրդ տալու ընտանի կենդանի պահել,- ասում է հետազոտության ղեկավար, Միսսուրիի համալսարանի տարեցների խնամքի մասնագետ Ռեբեկկա Ջոնսոնը: Հետազոտությունը, որը հիմնվել է ազգային մասշտաբով լայն ընտրանքի վրա, կապ է հայտնաբերել շան հետ զբոսանքների եւ ֆիզիկական առողջության միջեւ, հիմնվելով ազգային մասշտաբով լայն ընտրանքի վրա»:
Հետազոտության ընթացքում ուսումնասիրվել են մասնակիցների` ընտանի կենդանու հետ փոխազդեցության, ֆիզիկական ակտիվության, բժիշկներին այցելելու հաճախության եւ առողջական վիճակի մասին տվյալներ: Գիտնականները նշում են, որ իրենց ընտանի կենդանու հանդեպ կապվածության մեծ զգացում ունեցողները շատ ժամանակ են անցկացնում` զբոսնելով նրա հետ: Շան հետ զբոսանքներն օգնում են նոր մարդկանց հետ ծանոթանալ, օրինակ` շների այլ տերերի:
Հետազոտության հեղինակները կարծում են, որ շուն պահելու եւ նրա հետ զբոսնելու հնարավորությունը դրական կազդի նաեւ այն մարդկանց առողջության վրա, ովքեր տարեցների համար տարբեր հաստատություններում են ապրում:
