Լարսի սահմանային անցակետն այսօր՝  հուլիսի 4-ին,  ժամը 17:00-ից փորձնական կբացվի 4x4 թեթեւ մարդատար մեքենաների համար:  Այս մասին NEWS.am-ը տեղեկացավ  ՀՀ տրանսպորտի եւ կապի նախարարությունից:

«Վրաստանի ենթակառուցվածքների նախարարության ճանապարհային դեպարտամենտից  ՀՀ տրանսպորտի եւ կապի նախարարությանը հայտնեցին, որ այսօր՝ հուլիսի 4-ին, ժամը 17։00-ից Լարսի սահմանային անցակետը փորձնական կբացվի 4x4 թեթեւ մարդատար մեքենաների համար։

Այսօր երեկոյան կամ վաղն առավոտյան տեղեկություն կտրամադրվի նաեւ Լարսի ճանապարհով այլ տիպի մեքենաների (նաեւ ծանրաքարշ) երթեւեկության հնարավորության մասին»,-ասված է հաղորդագրության մեջ:

Հիշեցնենք, որ Վերին Լարս անցակետը փակվել է սելավաջրերի հետեւանքով Ռազմավրացական ճանապարհի մի հատվածի փլվելու պատճառով: Վրաստանն ու Հայաստանը հիմա զրկված են Ռուսաստանի հետ ցամաքային կապից: