Պետք է բարձրացվի ընտանիքների անապահովության գնահատման  համակարգի հասցեականությունն ու արդյունավետությունը: Այս մասին, այսօր՝ հուլիսի 6-ին, ՀՀ աշխատանքի եւ սոցիալական հարցերի նախարարությունում ընտանիքների անապահովության գնահատման  համակարգի եւ ընտանիքի կենսամակարդակի բարձրացմանն ուղղված նպաստների հասցեականության բարձրացման խնդիրների քննարկման ժամանակ նշել է նախարար Արտեմ Ասատրյանը:

Նախարարությունից NEWS.am-ին հայտնում են, որ Արտեմ Ասատրյանը կարեւորելով քննարկման թեման, նշել է, որ այն սոցիալական պաշտպանության ոլորտի կարեւորագույն  ծրագրերից մեկն է. «1999թ. ներդրված համակարգը  պետք է ավելի կատարելագործվի, պետք է բարձրացվի համակարգի հասցեականությունն ու արդյունավետությունը  եւ համապատասխանեցվի ներկայիս սոցիալ-տնտեսական  իրողություններին»: Նրա խոսքով, Աշխատանքի եւ սոցիալական հետազոտությունների ազգային ինստիտուտում ստեղծվել է օղակ, որն այսուհետ զբաղվելու է  տնային տնտեսությունների ամբողջացված հետազոտությունների  վերլուծությամբ եւ ուսումնասիրությամբ:

Նախարարը նաեւ անդրադարձել է վերջին տարիներին  նպաստների համակարգում կատարված  բանաձեւերի, գործակիցների փոփոխություններին եւ վստահություն հայտնել, որ  այդ խնդիրները  համալիր լուծման արդյունքում ցանկալի արդյունք կտան:

Հանդիպման ընթացքում Տնտեսական զարգացման եւ հետազոտությունների կենտրոնը ներկայացրել է «Օքսֆամ» հայաստանյան մասնաճյուղի աջակցությամբ իրականացրած «Ընտանիքի կենսամակարդակի բարձրացմանն ուղղված նպաստներ» ծրագրի գնահատման զեկույցը, որի նպատակը պետական բյուջետային ծրագրերի իրազեկվածության  մակարդակի բարձրացումն է եւ համագործակցությունը քաղաքացիական հասարակության ներկայացուցիչների հետ:

Մասնավորապես, ներկայացվել է Հայաստանում աղքատության եւ առողջապահական պատկերը, նպաստառուների կենցաղային պայմանները, եկամուտներն ու ծախսերը, ներկայացվել են նաեւ առաջարկություններ:

Նախարար Արտեմ Ասատրյանը գնահատելով   կատարված հետազոտությունը, նշել է, որ բարձրացված խնդիրների հիմնական մասին նախարարությունը թեեւ ծանոթ է, սակայն անկախ գնահատումը եւս օգտակար կլինի համակարգի  հետագա փոփոխությունների համար:

Հանդիպման ընթացքում ներկայացվել են սոցիալական աջակցության ծրագրերի տրամադրման գործընթացի ներդաշնակեցման հարցերը, Աշխատանքի եւ սոցիալական հետազոտությունների ընտանիքների անապահովության վիճակագրական գնահատման բաժնի կողմից կատարված աշխատանքները:

Քննարկվել  են  «բացակա» եւ «հարգելի բացակա» անդամ ունեցող ընտանիքների ուսումնասիրությունների արդյունքները եւ ներկայացվել ՀՀ կառավարության որոշման նախագիծը:

Ամփոփելով քննարկումը՝ նախարար Արտեմ Ասատրյանը շնորհակալություն  է հայտնել գործընկերներին մասնակցության եւ կատարված աշխատանքների համար  եւ  հանձնարարել  տասնօրյա ժամկետում բարձրացված հարցերը եւ հնչած առաջարկությունները ի մի բերել եւ նախանշել առաջիկա անելիքները:

Հանդիպմանը ներկա էին ՀՀ աշխատանքի եւ սոցիալական հարցերի նախարարության պաշտոնյաներ, Աշխատանքի եւ սոցիալական հետազոտությունների ինստիուտի, «Օքսֆամ» հայաստանյան մասնաճյուղի եւ Տնտեսական զարգացման եւ հետազոտությունների կենտրոնի ներկայացուցիչներ: