Նիսում հուլիսի 14-ին ահաբեկչության հետեւանքով մահացել է Հայաստանի քաղաքացի՝ 24-ամյա Արեւիկը։ 

NEWS.am-ի տեղեկություններով՝ երիտասարդ հայ կինը  երկու երեխաների մայր էր, տոնակատարությանը մասնակցում էր երեխաների, ամուսնու եւ սկեսուրի հետ։

Նշենք, որ ընտանիքը բնակվում է Նիսում։

Հայաստանի ԱԳՆ տվյալներով, Նիսում ահաբեկչությունից ՀՀ երկու քաղաքացի է զոհվել: Մյուս զոհը 34–ամյա կին է, որը մանկահասակ երեխա ունի։ Իր հերթին Հայ եկեղեցու Նիսի հոգեւոր հովիվ Հայր Գրիգոր աբեղա Խաչատրյանը NEWS.am-ին հայտնել է, որ վիրավորների մեջ կա երեք հայ: 

Հիշեցնենք, որ հուլիսի 14-ի երեկոյան՝ տեղական ժամանակով ժամը 22։30-ի սահմաններում, Նիսի Անգլիական ափին հավաքված մարդկանց խմբի մեջ մեծ արագությամբ բեռնատար էր մխրճվել։ Վարորդը մարդկանց մեջ էր մխրճվել Բաստիլի գրավման օրվա տոնական հրավառության ժամանակ։ Բեռնատարը, մոտ 2 կմ զիգզագաձեւ շարժվելով, փորձել է հնարավորինս շատ մարդկանց ճզմել։ Հետո վարորդը կրակ էր բացել մարդկանց վրա։ Ոստիկանության գործողությունների արդյունքում նա սպանվել է։ Բեռնատարի մեջ հայտնաբերվել է մեծ քանակությամբ զենք եւ պայթուցիկ։

Ըստ վերջին տեղեկությունների՝ զոհվել է 84 մարդ, ավելի քան 18-ի վիճակը ծայրահեղ ծանր է։ Վարորդը Ֆրանսիայի եւ Թունիսի քաղաքացի է։ Նա 31 տարեկան է։ Նախկինում ոստիկանության ուշադրության կենտրոնում էր հայտնվել գողության եւ խուլիգանության համար։