նախընտրելի դարձնելԲնակարանաշինության ծրագրի իրականացման համար, 2016թ.-ին ՎիվաՍել-ՄՏՍ-ը մոտ 105մլն. դրամի ներդրում է կատարել. Հայաստանի «Ֆուլեր Տնաշինական կենտրոնի» հետ գործակցության արդյունքը 192 մարդու երջանկության առիթ է դարձել:
Բնակարանաշինության համատեղ ծրագիրը շարունակում է օգնել Հայաստանի տասը մարզում բնակվող, տան կարիք ունեցող ընտանիքներին: Համագործակցող կազմակերպությունների ղեկավարներն ու աշխատակիցները, դարձյալ կամավորականության սկզբունքով, շինարարական աշխատանքների են մասնակցել: Այս անգամ նրանք Գեղարքունիքի մարզի Վարսեր համայնքում պատերի ծեփամածկման աշխատանքներ են կատարել Ստեփանյանների կիսակառույց տանը:
Ստեփանյանների ընտանիքը, որը 17 տարի բնակվել է մետաղական տնակում՝ դոմիկում, բնակարանաշինության ծրագրում այս տարի ընդգրկված՝ Գեղարքունիքի մարզի 3 ընտանիքներից մեկն է:
«Երեք երեխաներիս մանկությունն ու պատանեկությունն անցել ենմետաղական պատերի ներսում, ուր սարսափելի ցուրտ ձմեռներ ենք անցկացրել: Փոքր որդիս՝ Սամվելը, ծնվել է այս դոմիկում: Տասը տարուց ավելի է, որ սկսել ենք տան շինարարությունը: Եթե չլիներ ձեր օգնությունը, մենք երբեք այս տունն ավարտին չէինք հասցնի: Այս ձմեռն այլեւս սարսափելի չէ մեզ համար: Բառեր չեմ գտնում՝ հայտնելու երախտագիտությունս»,- ասել է ընտանիքի մայրը՝ Անին:
«Ամենակարեւոր արժեքը մարդն է: Մեր բոլոր ծրագրերի գնահատման միավորը մեր համաքաղաքացիների գոհունակությունն է: Եթե այդ ցուցիչը կա, ուրեմն ծրագիրն արդարացված է: Իսկ այդ գոհունակությունը ձեւավորվում է բազմաշերտ գործոնների համադրությամբ: Բավական չէ որպես բիզնես հասարակությանը միայն առաջարկել ապրանք: Մենք մատուցում ենք բարձրակարգ ծառայություններ, նորարարական լուծումներ, շուկայում պահպանում ենք առաջատարի մեր դիրքերը՝ զուգահեռաբար աջակցում ենք խնդիրները հաղթահարելու հարցում: Դա անհատի, հասարակության եւ երկրի նկատմամբ դրսեւորվող պատասխանատու մոտեցում է: Տարիների իրենց երազանքին հասած բոլոր ընտանիքները ձեռք են բերել ոչ միայն նյութական արժեք՝ բնակարան, այլեւ ապագան հավատով ապրելու վստահություն, միմյանց խնդիրներին արձագանքելու, դրանք լուծելու պատրաստակամություն եւ այլն: Հաճելի է արձանագրել, որ մեր կազմակերպության՝ տարիների ռազմավարությունն այսօր սկսում է որպես արժեհամակարգ ձեւավորվել նաեւ այլ ընկերություններում եւ միջավայրում»,-ասել է ՎիվաՍել-ՄՏՍ-ի գլխավոր տնօրեն Ռալֆ Յիրիկյանը:
«Անհնար է թվերի վերածել եւ ցույց տալ այն երջանկությունը, որն առիթ ենք ունենում տեսնելու մեր ընտանիքներում: Բոլորի պատմությունները տարբեր են՝ տուն չունենալու հոգսը նույնն է: Նոր կառուցված տները տարբեր են՝ երջանկությունը նույնն է: Վստահաբար կարող եմ ասել, որ միայն տներ չէ, որ նորոգում ենք, այլ՝ ճակատագրեր»,- ասել է Հայաստանի «Ֆուլեր Տնաշինական Կենտրոնի» նախագահ Աշոտ Եղիազարյանը:
Կազմակերպությունների ղեկավարները այցելել են նաեւ նույն մարզի Զոլաքար համայնք՝ իրենց հարգանքի տուրքը մատուցելու ապրիլյան պատերազմի ժամանակ զոհված 19 ամյա Դավիթ Հայրապետյանի ընտանիքին, ում տունը վերանորոգվել է ծրագրի շրջանակներում:
Հինգ տարվա ընթացքում, բնակարանաշինության ծրագրի համար՝ ՎիվաՍել-ՄՏՍ-ը 333 մլն. դրամից ավելի ներդրում է կատարել, ինչի արդյունքում 134 ընտանիքի՝ 672 մարդու կյանք բարելավվել է: 2016թ.-ին 41 ընտանիքի համար լուծվել է բնակարանի խնդիրը. 20 ընտանիք վերանորոգել է բնակարանը, 21 ընտանիք՝ ավարտում է կիսակառույց տան շինարարությունը:
