նախընտրելի դարձնելՀՀ աշխատանքի եւ սոցիալական հարցերի նախարար Արտեմ Ասատրյանը հոկտեմբերի 24-ին ընդունել է Հայաստանում Վրաստանի նորանշանակ արտակարգ եւ լիազոր դեսպան Գիորգի Սագանելիձեին եւ նրան ներկայացրել սոցիալական պաշտպանության ոլորտում իրականացվող բարեփոխումները:
Նախարարությունից NEWS.am-ին հայտնում են, որ շնորհավորելով նորանշանակ դեսպանին՝ նախարարը հույս է հայտնել, որ դեսպանն իր դիվանագիտական առաքելությամբ մեծ ներդրում կունենա երկու բարեկամ ժողովուրդների հարաբերությունների զարգացման գործում: Այնուհետեւ, նախարարը ներկայացրել է սոցիալական պաշտպանության ոլորտում իրականացվող բարեփոխումները, մասնավորապես՝ կուտակային կենսաթոշակային համակարգը, ներկայիս զարգացումները, զբաղվածության պետական ծրագրերը, որոնք ուղղված են աշխատաշուկայում անմրցունակ անձանց, ինչպես նաեւ անդրադարձել ոլորտի մյուս ծրագրերին:
Գիորգի Սագանելիձեն բարձր է գնահատել ոլորտում կատարված բարեփոխումները, որոնք հիմնականում ուղղված են հասարակության խոցելի շերտերին: Արժեւորելով երկու երկրների բարեկամական հարաբերությունները՝ դեսպանը պատրաստակամություն է հայտնել իր առաքելությամբ ներդրում ունենալ երկու երկրների միջեւ կապերի խորացման ու ամրապնդման գործում:
