նախընտրելի դարձնելՄարդու իրավունքների պաշտպան Արման Թաթոյանը Ժնեւում ՄԱԿ-ի Խոշտանգումների կանխարգելման ենթակոմիտեի նախագահ Մալկոլմ Էվանսի հետ քննարկել է նոր օրենսդրական փոփոխությունները խոշտանգումների կանխարգելման ոլորտում:
ՄԻՊ-ից NEWS.am-ին հայտնում են, որ նա Ժնեւում մասնակցել է «Խոշտանգումների եւ այլ դաժան, անմարդկային կամ արժանապատվությունը նվաստացնող վերաբերմունքի կամ պատժի դեմ կոնվենցիայի» կամընտիր արձանագրությանը նվիրված բարձրաստիճան համաժողովին:
Արման Թաթոյանը նրան է ներկայացրել «Մարդու իրավունքների պաշտպանի մասին» ՀՀ օրենքի նախագծի դրույթները: Հատկապես քննարկվել են նախագծի այն դրույթները, որոնք ուղղված են օմբուդսմանի՝ որպես կանխարգելման ազգային մեխանիզմի գործունեությանը, նրա անկախության ապահովմանը, քաղաքացիական հասարակության հետ նրա պրոֆեսիոնալ աշխատանքի սկզբունքների իրացմանը: Մ. Էվանսի կողմից կարեւորվել է քաղաքացիական հասարակության հետ աշխատանքի այն մեխանիզմը, որը ներդրված է նախագծում:
Միջոցառման ընթացքում քննարկվել է օմբուդսմենների դերը՝ որպես խոշտանգումների կանխարգելման ազգային մեխանիզմներ, քաղաքացիական հասարակության եւ պետության հետ նրանց հարաբերությունների առանձնահատկությունները: Կարեւորվել է պետության կողմից ազգային մեխանիզմների աշխատանքի անկախության երաշխիքների ամրապնդումը:
Միջոցառմանը հրավիրված են մասնակցելու բարձրաստիճան ներկայացուցիչներ ՄԱԿ-ի անդամ պետություններից, միջազգային փորձագետներ, ինչպես նաեւ ներկայացուցիչներ միջազգային կազմակերպություններից:
