Տարբեր երկրներում ամանորյա տարատեսակ ավանդույթներ կան, սակայն որոշները կարող են բավական տարօրինակ թվալ: Բրիտանական «The Telegraph»-ը ներկայացրել է վեց ամենատարօրինակ ամանորյա ավանդույթները:

1. Կարմիր ներքնազգեստ, Թուրքիա

Մտերիմներին հաջողություն բերելու ավելի լավ տարբերակ կա՞, քան ամանորյա զգեստի տակից կարմիր ներքնազգեստ հագնելն է: Այս պրակտիկան Թուրքիայում շատ տարածված է: Տոների շրջանում խանութներն այստեղ լի են կարմիր ներքնազգեստով:

2. Զանգվածային համբույրներ, Վենետիկ

Վենետիկի Սուրբ Մարկոսի հրապարակը հայտնի է ոչ միայն Ամանորի գիշերը կազմակերպվող տոնական հրավառությամբ, այլեւ արտասովոր մի ավանդույթով՝ զանգվածային համբույրներով:

3. Արջերի պար, Ռումինիա

Որոշ ռումինացիներ Ամանորը տոնում են արջի կոստյումով եւ մորթով: Այդ հագուստով էլ նրանք տնետուն են այցելում:

4. Գիշեր գերեզմանատանը, Չիլի

Չիլի փոքրիկ քաղաքում ամանորյա ամենատարօրինակ ավանդույթը կա: Տեղի բնակիչները հավաքվում են գերեզմանատանը՝ Ամանորն իրենցից հեռացած հարազատների եւ սիրելիների հետ նշելու համար: Այս ավանդույթը հարյուրամյակների պատմություն ունի: Ավանդույթի համաձայն, այն ծնվել է, երբ երեխաները տարվա վերջին օրը գերեզմանատուն են գնացել՝ հանգուցյալ հոր կողքին լինելու համար:  Հիմա ամեն տարի դեկտեմբերի 31-ին ժամը 23:00-ին քաղաքապետը բացում է գերեզմանատան դարպասները: Գերեզմանատունը գեղեցիկ լուսավորվում է, այնտեղ դասական երաժշտություն է հնչում:

5. Շնորհավորանք կովերի համար, Բելգիա

Բելգիական կաթնային շոկոլադը հայտնի է ամբողջ աշխարհին, եւ այս երկրում կովերին հատուկ ուշադրություն են հատկացնում: Բելգիացի ֆերմերներն ավանդույթ ունեն. հունվարի 1-ի վաղ առավոտյան արթնանում են ու գնում կովերին շնորհավորելու: