նախընտրելի դարձնել
«Զինված խմբի» գործով ամբաստանյալ Վահագն Սալնազարյանի պաշտպանն այսօր՝ հունիսի 23-ին, միջնորդեց փոխել իր պաշտպանյալի խափանման միջոցն ու գրավի դիմաց ազատ արձակել:
Երեւանի Կենտրոն եւ Նորք Մարաշ վարչական շրջանների ընդհանուր իրավասության դատարանում պաշտպան Մնացական Ղազարյանը հայտարարեց, որ եթե Վահագն Սալնազարյանը զինված խմբի անդամ լիներ, տաքսի ծառայությունը կտրամադրեր անվճար՝ «վեհ, հայրենասիրական գաղափարներից ելնելով», մինչդեռ ինքը գումարի դիմաց տաքսի ծառայություն է իրականացրել:
«Խմբի անդամ չի եղել, ուխտագնացությունների չի մասնակցել, դիմակավորված կամ առանց դիմակավորվելու չի լուսանկարահանվել: Խմբի անդամների կազմում պետական կարեւորագույն օրգանների գրավման պլանների մշակմանը չի մասնակցել եւ որեւէ դերակատարում նա չի ունեցել: Սալնազարյանը միմիայն իրականացրել է տաքսի ծառայություն, որն էլ գործի նյութերով հիմնավորվել է»,- ասաց պաշտպանը:
Դատարանը, վերադառնալով խորհրդակցական սենյակից, հայտարարեց, որ միջնորդությունը մերժեց;
Ըստ մեղադրական եզրակացության՝ Արթուր Վարդանյանը 2015թ. ապրիլից ստեղծել ու ղեկավարել է ՀՀ քաղաքացիներից կազմված հանցավոր համագործակցություն, կազմակերպված խմբի կազմում ապօրինի կերպով ձեռք է բերել, պահել, փոխադրել և կրել մեծ քանակությամբ զենք, ռազմամթերք, պայթուցիկ նյութեր, պայթուցիկ սարքեր` նպատակ ունենալով Հայաստանի Հանրապետությունում իշխանությունը յուրացնել: Այսինքն` զավթել` բռնություն գործադրելու կամ բռնություն գործադրելու սպառնալիքով, ինչը ավարտին չի հասցվել նրա կամքից անկախ հանգամանքներում, քանի որ հանցավոր համագործակցության մեջ ներգրավված անձինք բացահայտվել ու 2015թ. նոյեմբերի 25-ին վնասազերծվել են Հայաստանի Հանրապետության ազգային անվտանգության ծառայության աշխատակիցների կողմից:
Հայր Անտոն Դիկրան Թոթոնջյանն էլ 2015թ. ապրիլից անձնապես ծանոթացել է Իսպանիայից ժամանած Արթուր Վարդանյանի հետ, մասնակցել է վերջինիս կողմից ստեղծված ու ղեկավարած հանցավոր համագործակցությանը` ֆինանսավորելով այն:
Պաշտպանության նախկին փոխնախարար Վահան Շիրխանյանը, Գառնիկ Մարգարյանը, Վլադիմիր Առաքելյանը, Խաչիկ Ավետիսյանը, Ավետիս Բարեյանը, Վաղինակ Ստեփանյանը, Արթուր Եղիազարյանը, Վահագն Սալնազարյանը, Արման Հայրապետյանը, Էդվարդ Ներսիսյանը, Հարություն Սարիբեկյանը, Արա Պողոսյանը, Տիգրան Բոյաջյանը, Գեւորգ Ջնդոյանը, Արկադի Մարդոյանը, Ասյա Մկրտչյանը, Մարինե Կաթանյանը, Նելլի Մինասյանը նույնպես միացել են Արթուր Վարդանյանին:
Նրանց բոլորին մեղադրանք է առաջադրվել Քրեական օրենսգրքի 223-րդ հոդվածի (Հանցավոր համագործակցություն ստեղծելը կամ հանցավոր համագործակցությանը մասնակցելը), 235-րդ հոդվածի 3-րդ (Ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը, կատարվել են կազմակերպված խմբի կողմից) եւ 35-300-րդ հոդվածի 1-ին մասով (Իշխանությունը յուրացնելու նախապատրաստություն): Նշենք, որ դատարան է ուղարկվել այն անձանց գործը, որոնց մեղադրանքը հետագայում խստացվել էր:
