նախընտրելի դարձնելՀՀ քննչական կոմիտեի Երեւան քաղաքի քննչական վարչությունում ձեռնարկվում են անհրաժեշտ քննչական գործողություններ՝ «Զվարթնոց» օդանավակայանում իշխանության ներկայացուցիչների նկատմամբ բռնություն գործադրելու դեպքի հանգամանքները պարզելու ուղղությամբ: Մեկ անձ ձերբակալվել է:
Նախնական տվյալներով՝ 2017թ. օգոստոսի 7-ին՝ ժամը 19:40-ի սահմաններում, ենթադրյալ հանցագործություն կատարած անձն իր վարած «Մերսեդես» մակնիշի ավտոմեքենայով կայանել է «Զվարթնոց» օդանավակայանի ժամանման սրահի դիմաց՝ երթեւեկելի գոտու աջ հատվածում, որի համար օդանավակայանում ծառայություն իրականացնող ճանապարհային ոստիկանության տեսուչներ Ա.Մարդոյանը եւ Գ.Ղանթարչյանը մի քանի անգամ բարձրախոսով զգուշացրել են՝ մեքենան կայանման համար արգելված գոտուց դուրս բերելու վերաբերյալ։ Քաղաքացին չի ենթարկվել նրանց օրինական պահանջներին, ինչպես նաեւ չի ներկայացրել տեսուչների կողմից պահանջվող փաստաթղթերը, փոխարենը բարձրաձայն հայհոյել եւ բռնություն է գործադրել վերջիններիս նկատմամբ:
Դեպքի առթիվ հարուցվել է քրեական գործ՝ ՀՀ քրեական օրենսգրքի 316-րդ հոդվածի 1-ին մասի հատկանիշներով, որով նախաքննությունն իրականացվում է ՀՀ ՔԿ Երեւան քաղաքի քննչական վարչությունում:
Ենթադրյալ հանցագործություն կատարած անձը ձերբակալվել է: Քրեական գործով էական նշանակություն ունեցող մի շարք հանգամանքներ պարզելու նպատակով նշանակվել է դատաբժշկական փորձաքննություն:
Նախաքննությունը շարունակվում է: Միջոցներ են ձեռնարկվում՝ դեպքի հանգամանքների բազմակողմանի, լրիվ եւ ամբողջական քննությունն ապահովելու ուղղությամբ:
