նախընտրելի դարձնելՀՀ Տնտեսական մրցակցության պաշտպանության պետական հանձնաժողովի նախագահ Արտակ Շաբոյանն այսօր՝ հոկտեմբերի 20-ին, հանդիպել է Ինֆորմացիոն տեխնոլոգիաների ձեռնարկությունների միության, Եվրոպական բիզնես ասոցիացիայի եւ Իրավաբանների հայկական ասոցիացիայի ներկայացուցիչների, ինչպես նաեւ վերջիններիս անդամ հանդիսացող մի շարք ընկերությունների ղեկավարների հետ:
ՏՄՊՊՀ-ից NEWS.am-ին հայտնում են, որ հանդիպման նպատակը հասարակական կազմակերպությունների անդամների հետ մրցակցային խնդիրներին առնչվող հարցերի քննարկումն էր:
ՀՀ Մրցակցային մարմնի ղեկավարը իր խոսքում նշել է, որ Հանձնաժողովի համար շատ կարեւոր է հասարակական կազմակերպությունների հետ ակտիվ համագործակցությունը, որն արդյունքում բերում է նոր խնդիրների վերհանմանն ու լուծմանը. «Դուք բոլորդ գիտեք, որ Հանձնաժողովի ռեսուրսները սահմանափակ են, եւ միայն սեփական նախաձեռնությամբ, բնականաբար, հնարավոր չէ վերհանել դաշտում առկա բոլոր խնդիրները: Այդ իսկ պատճառով մեզ համար նման համագործակցությունը միայն ողջունելի է, այն կբերի առավել արդյունավետ աշխատանքին ու դաշտի էլ ավելի բարեփոխմանը»:
ՀԿ-ների ներկայացուցիչների հետ քննարկվել են պետական գնումների, պետական օժանդակության, իրական շահառուների բացահայտման, ինչպես նաեւ մրցակցային օրենսդրության բարեփոխումներին առնչվող մի շարք հարցեր:
