նախընտրելի դարձնելՀՀ տարածքային կառավարման եւ զարգացման նախարար Դավիթ Լոքյանը հոկտեմբերի 25-ին ներկա է գտնվել Գյումրիի տեխնոլոգիական կենտրոնում ՏՏ ինկուբացիոն լաբորատորիայի բացման արարողությանը։ Միջոցառմանը ներկա էին նաեւ Հայաստանում Եվրոպական միության դեսպան Պյոտր Սվիտալսկին, Շիրակի մարզպետ Արթուր Խաչատրյանը, Մայքրոսոֆթ ինովացիոն կենտրոնի տնօրեն Արտաշես Վարդանյանը, տեղական եւ պետական կառավարման մարմիններից, ՏՏ սեկտորի առաջատար ընկերություններից ներկայացուցիչներ:
Նախարարությունից NEWS.am-ին հայտնում են, որ ԵՄ-ի եւ ՀՀ տարածքային կառավարման եւ զարգացման նախարարության կողմից ֆինանսավորվող «Տեխնոլոգիական զարգացման խթանումը Շիրակի մարզում» ծրագրի շրջանակում հիմնված լաբորատորիան մարզի 17-35 տարեկան գործազուրկներին կտրամադրի տեղեկատվական տեխնոլոգիաների 5-ամսյա դասընթաց: Ծրագիրը, որը ներառելու է շուրջ 200 մասնակից, համագործակցում է տեղական ՏՏ ընկերությունների հետ՝ բացահայտելու նրանց մարդկային ռեսուրսների պահանջարկը, եւ դրա հիման վրա կրտսեր ծրագրավորողներ է պատրաստում: Դասընթացի առաջին փուլն արդեն ավարտված է, ինտենսիվ ուսուցման ծրագիրն անցել է ավելի քան 50 մարդ, ովքեր նոյեմբերի սկզբից կմասնակցեն իրենց պոտենցիալ գործատուների կողմից տրամադրվող գործնական աշխատանքների փուլին: Ծրագիրն ակնկալում է ունենալ տեղական ընկերություններում աշխատող մոտ 90 ՏՏ մասնագետներ:
Նախարար Դավիթ Լոքյանը իր խոսքում կարեւորելով նման կենտրոնի բացումը, ասել է, որ այս ծրագրով փորձում են Շիրակի մարզում լուծել երիտասարդների գործազրկության խնդիրը, բարելավել նրանց գիտելիքներն ու հմտությունները ՏՏ ոլորտում, որն այսօր առաջնային է Հայաստանի համար: Իր ելույթում նախարարը խոսել է նաեւ Շիրակի մարզի խնդիրների մասին. մարզում մեկ շնչին բաժին ընկնող ՀՆԱ-ն ամենացածրն է Հայաստանում, եւ նախարար Լոքյանը հայտարարել է, որ Կառավարությունն իր առջեւ խնդիր է դրել մինչեւ 2025 թվականը բարելավել վիճակը: Նա մանրամասն ներկայացրել է մարզում Կառավարության իրականացվող եւ սպասվող տարբեր ձեռնարկների մասին, հատկապես կարեւորել մարզում մարդկանց տրամադրության ու մթնոլորտի փոփոխությունը:
Դեսպան Սվիտալսկին էլ իր ելույթում ընդգծել է նման ծրագրերի կարեւորությունը. «EU4Business եւ EU4Regions նախաձեռնությունների շրջանակում Եվրոպական միությունն աջակցում է Մայքրոսոֆթ ինովացիոն կենտրոնին եւ Գյումրու տեղեկատվական տեխնոլոգիաների կենտրոնին՝ Շիրակի մարզում տեխնոլոգիական զարգացումը խթանելու համար: Ծրագրի նպատակն է ավելացնել բարձրորակ արտադրանք թողարկող փոքր բիզնեսների քանակը, ինչպես նաեւ հզորացնել Շիրակի մարզի երիտասարդ մասնագետների հմտությունները ՏՏ ոլորտում՝ որպես տնտեսական աճի եւ համապարփակ զարգացման խթան»:
Շիրակի մարզպետ Արթուր Խաչատրյանն էլ իր հերթին շնորհավորել է նոր ձեռնարկի իրականացման կապակցությամբ, նկատել, որ Շիրակի մարզը միշտ աչքի է ընկել մտավոր մեծ հնարավորությամբ, նորարարություններով ու նորը ստեղծելու ջիղով: Նա վստահեցրել է, որ նորաբաց լաբորատորիան գործելու է ոչ միայն այս պատերի ներսում ու գյումրեցի երիտասարդների համար, այլ` ողջ մարզի: ՄԻԿ-ի տնօրեն Արտաշես Վարդանյանի կարծիքով նույնպես, Շիրակի մարզը մարդկային ռեսուրսների հսկայական ներուժ ունի։ Ծրագրի միջամտությունը ներառում է թիրախային գործողություններ` ուղղված ՏՏ ընկերությունների ընդլայնմանը եւ նոր աշխատատեղերի ստեղծմանը:
Բացման ելույթներին հետեւել է կարճատեւ շրջայցը, որի ընթացքում լսարանին ներկայացվել է լաբորատորիայի նպատակը եւ գործառույթները: Շրջայցից հետո նախագիծը հայտարարեց ենթադրամաշնորհի արդյունքները: 7 տեղական ՏՏ ընկերություններ 5,000-10,000 եվրոյի սահմաններում դրամաշնորհներ կստանան` իրենց գործունեության ընդլայնման եւ ծրագրի աշխատակիցների համար նոր աշխատատեղերի ստեղծման նպատակով:
