նախընտրելի դարձնելԴատավոր Վարդան Գրիգորյանը մերժեց իրեն ներկայացված ինքնաբացարկի միջնորդությունը: Դատարանը 2 ժամ անց խորհրդակցական սենյակից վերադառնալուց հետո հրապարկեց որոշումը՝ նշելով, որ միջնորդությունը մերժում է այն հիմնավոր չլինելու պատճառաբանությամբ:
Սարի թաղում 2016թ. հուլիսի 29-ին զանգվածային անկարգություններ հրահրելու մեջ մեղադրվող Անդրիաս Ղուկասյանի շահերի պաշտպան Կարեն Մեժլումյանն այսօր` նոյեմբերի 7-ին, ինքնաբացարկի միջնորդություն էր հայտնել նախագահող դատավոր Վարդան Գրիգորյանին: Կարեն Մեժլումյանը նշել էր, որ դատավորը կողմնակալ է, հանդես է գալիս մեղադրական կողմից: Պաշտպանի խոսքով, դատավորի կողմնակալությունն ավելի ակնհայտ է երեւացել անցած դատական նիստին` գործով վկա Գեղամ Սահակյանի հարցաքննության ժամանակ: Նրա խոսքով, վկան ունի պարանոյիդ անձնային խանգարում եւ պաշտպանական կողմի հարցերը` վկայի հոգեկան անառողջությունը բացահայտելուն ուղղված, դատավորը անթույլատրելի է համարել, որն էլ մեկ անգամ եւս ապացուցում է, որ դատարանն անաչառ չէ:
Պաշտպանի այս միջնորդության դեմ առարկություն էր հայտնել մեղադրող Պետրոս Պետրոսյանը՝ նշելով, որ ամբաստանյալի եւ պաշտպանի բերած ինքնաբացարկ ներկայացնելու հիմնավորումները ենթադրությունների վա են հիմնված: Ըստ մեղադրանքի՝ Անդրիաս Ղուկասյանը 2016 թվականի հուլիսի 29-ին Երեւանում զանգվածային անկարգություններ է կազմակերպել, ինչպես նաեւ փորձել է միանալ 2016 թվականի հուլիսի 17-ին Երեւանի Խորենացի փողոցի 158 հասցեում տեղակայված՝ Հայաստանի ոստիկանության Երեւանի վարչության պարեկապահակային ծառայության գնդի տարածքում գտնվող շենքերը, շինությունները եւ տրանսպորտային միջոցները զավթած, ոստիկաններ եւ բուժաշխատակիցներ պատանդ վերցրած կազմակերպված, զինված խմբին, զինվել, ապօրինի կերպով հրազեն ու ռազմամթերք կրել, պահել եւ խմբի անդամների հետ համակատարմամբ շարունակել պահել զավթածն ու պատանդներին, սակայն հանցագործություններն ավարտին չի հասցրել իր կամքից անկախ հանգամանքներով: Անդրիաս Ղուկասյանը կալանքի տակ է:
