Մեծ Բրիտանիայի թագուհի Եղիասաբեթ 2-րդը շնորհավորել է երկրի ռազմաօդային ուժերին հիմնադրման հարյուրամյակի առթիվ, հաղորդում է Press Association գործակալությունը։ Թագուհու շնորհավորական ուղերձը հրապարակվել է կիրակի Լոնդոնի «Savoy» հյուրանոցում կայացած հանդիսավոր արարողության ժամանակ, որին մասնակցում էին  բրիտանական ավիացիայի հրամանատարական կազմը։

«Աշխարհում առաջին անկախ ռազմաօդային ուժերի տարեդարձը մեծ նշանակություն ունի, եւ լրիվ տեղին է արժանին մատուցել նրանց շարքերում ծառայած կանանց եւ տղամարդկանց նպատակասլացությանը, մասնագիտական հմտություններին եւ ինքնազոհությանը, որոնք նախորդ հարյուրամյակի ընթացքում քաջորեն պաշտպանել են մեր ազատությունը»,-նշված է թագուհու ուղերձում։

Արարողության ժամանակ թագուհու շնորհավորանքը ընթերցել է ռազմաօդային ուժերի շարքայիններից 16-ամյա Ադամ Վուդը, որը երկրի ռազմաօդային ուժերի ամենաերիտասարդ զինվորականներից է:

Նշենք, որ «Savoy» հյուրանոցը պատահական չի ընտրվել։  Հենց այս հյուրանոցի շենքում 1918 թվականին հիմնադրվել է թագավորության ռազմաօդային ուժերի առաջին շտաբ-կայանը։