Հունիսի 28-ին տեղի ունեցած արտահերթ նիստի ժամանակ Հայաստանի Ազգային Ժողովն առաջին ընթերցմամբ  ընդունել է մի շարք օրինագծեր, հաղորդում է Լուրեր Հայաստանից-NEWS.am-ի թղթակիցը:

Պատգամավորները, մասնավորապես, հաստատել են.

«Պետական տուրքերի մասին» օրենքում փոփոխություններ կատարելու մասին օրինագիծ («կողմ»-79, «դեմ»-1, ձեռնպահ-3 պատգամավոր),

«ՀՀ քաղաքացիական դատավարության օրենսգրքում» փոփոխություններ կատարելու մասին օրինագիծ («կողմ»-84 պատգամավոր, միաձայն),

«Պետական կենսաթոշակների մասին» օրենքում փոփոխություններ եւ լրացումներ կատարելու մասին օրինագիծ («կողմ»-84, միաձայն),

«Պետական նպաստների մասին» օրենքում փոփոխություններ եւ լրացումներ կատարելու մասին օրինագիծ («կողմ»-84 պատգամավոր, միաձայն),

«Պաշտոնատար անձանց գործունեության ապահովման, սպասարկման եւ սոցիալական երաշխիքների մասին» օրենքում փոփոխություններ եւ լրացումներ կատարելու մասին օրինագիծ («կողմ»-83 պատգամավոր, միաձայն),

Հայաստանի Հանրապետության եւ Ամերիկայի Միացյալ Նահանգների միջեւ «Օտարերկրյա հաշիվների շուրջ հարկային օրենսդրության ակտը իրացնելու մասին» օրենքի իրականացմանը նպաստելու շուրջ համագործակցության մասին» համաձայնագիրը վավերացնելու օրինագիծ («կողմ»-83, միաձայն):

Խորհրդարանականները նաեւ հաստատել եւ երկրորդ ընթերցմամբ ընդունել են հետեւյալ օրենսդրական փոփոխությունները.

«Ապահովագրության եւ ապահովագրական գործունեության մասին» օրենքում («կողմ»-83, միաձայն),

Քրեակատարողական օրենսգրքում եւ «Ձերբակալված եւ կալանավորված անձանց պահելու մասին» օրենքում («կողմ»-84, միաձայն):

Ջրային օրենսգիրք («կողմ»-85, միաձայն):