«Ադեկվադ» միաբանությունը պարզաբանում է տարածել այսօր մամուլում հրապարակված տեղեկության վերաբերյալ, համաձայն որի Արթուր Դանիելյանի հոր դեմ քրեական գործ է հարուցվել։

Պարզաբանումն ամբողջությամբ ներկայացնում ենք ստորեւ․

Ի պատասխան մամուլում տեղ գտած տեղեկատվության` հայտնում ենք, որ Ադեկվադ միաբանության ղեկավար Արթուր Դանիելյանի հոր` Ռոբերտ Դանիելյանից ՀՀ ՔԿ ներկայացուցիչները հանրապետությունից չհեռանալու մասին ստորագրություն են վերցրել: Քննիչները նման պահանջ են ներկայացրել Ռոբերտ Դանիելյանի` նախապես պլանավորված բուժզննման մեկնելուց մեկ օր առաջ` այդպիսով անհնարին դարձնելով հույժ կարեւոր հետվիրահատական զննման անցկացումը:

Քննիչներն անտեսել են` թե իրենց ուշադրությանը ներկայացված զննման անհրաժեշտությունը հավաստող փաստաթղթերը եւ թե նախապես գնված հետադարձի տոմսերը:

Բուն գործը վերաբերվում է տաս տարի առաջ տրված փոխառությանը, որի փոխառուն ներկայումս գտնվում է սնանկության գործընթացի մեջ: Քննիչները վիճարկում են փոխառությունը հավաստող փաստաթուղթն այն դեպքում, որ դա չի վիճարկում ո´չ փոխառուն, ո´չ էլ պարտատեր Ռոբերտ Դանիելյանը: Ավելին, փոխառությունը հավաստող փաստաթուղթը ժամանակին վավերացվել է նոտարական կարգով, իսկ դրա իսկությունը կասկածի տակ դնող քննիչները նույնիսկ չեն էլ փորձել նախապես անցկացնել փաստաթղթի փորձաքննություն: Ուշագրավ է, որ գործը վարող առաջին քննիչը հընթացս հրաժարվել է գործը քննելուց եւ փոխարինվել է:

Հաշվի առնելով վերոհիշյալ փաստերը, չհեռանալու պահանջ ներկայացնելու հապճեպությունը եւ Արթուր Դանիելյանի ու Ադեկվադ միաբանության նկատմամբ իրավապահ համակարգի մինչ օրս շարունակվող սիստեմատիկ ու բացարձակապես անհիմն հետապնդումները, մենք եզրակացնում ենք, որ սա քաղաքական ընդդիմախոսների հետապնդման եւս մեկ աղաղակող դրվագ է: Դրվագ, որը դուրս է որեւէ բարոյական սահմաններից եւ միտված է ծնողի առողջական խնդիրների առաջացման սպառնալիքով հոգեբանորեն ազդել քաղաքական հակառակորդի վրա` շորթելով քաղաքական պասիվություն: Այս եւ նմանատիպ քայլեր ձեռնարկողները, նրանց թիմակիցները եւ գործընկերները բարոյական օրենքներից զուրկ են: Նրանք չեն կարող համարվել մարդ, քանի որ կրում են մարդուն բնորոշ միայն ֆիզիոլոգիական հատկանիշներ` զուրկ լինելով մարդուն այլ կենդանիներից տարանջատող կարեւորագույն հատկանիշներից: Եթե հանցագործներին մեկուսացնում են հասարակությունից, ապա նմանօրինակ բարոյազուրկ ու անմարդանման արարածների հետ պետք է վարվել այնպես, ինչպես ընդունված է վարվել գազազած փողոցային շների հետ:

Անիմաստ ենք համարում երկրում տեղի ունեցող իրադարձություններին եւ մասնավորապես այս դեպքին քաղաքական գնահատականներ տալը: Տեղի ունեցողը վաղուց դուրս է որեւէ քաղաքական հունից: Ավելորդ ենք համարում նաեւ նշել, որ սույն դրվագը որեւէ կերպ չի ազդելու միաբանության ղեկավարի եւ անդամների վճռականության վրա: