նախընտրելի դարձնել
Վերջին տարիներին հայ-ճապոնական հարաբերությունները դինամիկ զարգացում են ապրում եւ դա Հայաստանի համար կարեւոր ուղղություն է: Այս մասին այսօր` մայիսի 4-ին Երեւանում հայտարարել է Հայաստանի ԱԳ նախարար Էդվարդ Նալբանդյանը` Ճապոնիայի ԱԳ նախարարի առաջին տեղակալ Հիսասի Տոկունագայի հետ հանդիպման ժամանակ:
ԱԳՆ մամուլի ծառայությունից NEWS.am-ին հայտնում են, որ Էդվարդ Նալբանդյանը խորին ցավակցություններ է հայտնել մարտին Ճապոնիայում պատահած բնական արհավիրքների հետեւանքով հազարավոր զոհերի կապակցությամբ, Տոկունագան էլ երախտագիտություն հայտնել երկրաշարժի կապակցությամբ Հայաստանից ստացված ցավակցությունների եւ ցուցաբերած օժանդակության համար:
«Ճապոնիայի իշխանությունները բարձր են գնահատում Հայաստանի հետ բարեկամական հարաբերությունները եւ ցանկանում են առավել ընդլայնել դրանք»,- ասել է Ճապոնիայի փոխնախարարը:
Էդվարդ Նալբանդյանը գոհունակություն է հայտնել, որ շուրջ 2 տարի առաջ Տոկիո կատարած իր այցի ընթացքում ձեռք բերված մի շարք պայմանավորվածություններ իրականացվում են:
