նախընտրելի դարձնել
IPhone 13 սմարթֆոնները կունենան տեսախցիկի նոր հնարավորություններ՝ ներառյալ ProRes ռեժիմը եւ դիմանկարային ռեժիմը տեսանկարահանելիս, գրել է Bloomberg-ի խմբագիր Մարկ Գուրմանը:
Գուրմանի խոսքով՝ Apple-ն այս տարի ավելացնելու է դիմանկարային ռեժիմ, ինչը թույլ կտա տեսանկարահանել բոկե էֆեկտ ավելացնելով: Apple-ը iPhone 7 Plus-ում դիմանկարային ռեժիմ է ներկայացրել, սակայն այն օգտագործվում էր միայն լուսանկարների համար: Հարկ է նաեւ նշել, որ այս տարվա աշնանը iOS 15-ի թողարկումով FaceTime-ը կստանա դիմանկարային ռեժիմ բոլոր համատեղելի սարքերի համար, հաղորդել է IXBT-ն:
Դիմանկարային ռեժիմը թույլ է տալիս կենտրոնանալ անձի վրա՝ հետին պլանը ոչ հստակ նկարելով: IPhone 13-ի դեպքում Apple-ը նախատեսում է նույն տեխնիկան ավելացնել տեսանյութերի համար՝ օգտագործելով Cinematic Video գործառույթը: Ինչպես ստատիկ լուսանկարների դեպքում, այնպես էլ iPhone-ի խորության սենսորը էֆեկտ է ստեղծելու եւ թույլ է տալու օգտատերերին ձայնագրությունից հետո փոխել հստակության աստիճանը:
Դիմանկարային տեսանկարահանման ռեժիմի հետ մեկտեղ Apple-ը նախատեսում է ներդնել նաեւ ProRes ռեժիմը, որը թույլ կտա տեսագրել նոր ձեւաչափով եւ առաջարկելու է խմբագրման ավելի շատ տարբերակներ: Ինչպես ProRaw-ը բացառիկ է iPhone 12-ի ավելի թանկ մոդելների համար, այնպես էլ ProRes-ը կարող է բացառիկ լինել միայն iPhone 13 Pro-ի եւ iPhone 13 Pro Max-ի համար:
Բացի այդ, Apple-ը նաեւ նախատեսում է ավելի շատ լուսանկարների զտիչներ առաջարկել իր ապագա iPhone-ների օգտատերերի համար: Ամբողջ լուսանկարի վրա զտիչ կիրառելու փոխարեն, ապագա iPhone-ները ճշգրիտ կկիրառեն «լուսանկարներում առարկաների եւ մարդկանց փոփոխություններ՝ արհեստական ինտելեկտ օգտագործելով»: Օգտատերերը լուսանկարների վրա կիրառելու համար կկարողանան ընտրել մի քանի ոճերից:
