Բրազիլական Արասատուբա քաղաքում բանկի կողոպտիչները պատանդներին կապել են իրենց մեքենաներին՝ որպես «կենդանի վահան», որպեսզի կողոպուտից հետո կարողանան փախչել, հաղորդել է BBC-ն:

Ոստիկանությունը հայտնել է, որ առնվազն երեք մարդ է զոհվել, այդ թվում՝ մեկ կասկածյալ: Պաշտոնյաները հայտնել են, որ կողոպուտին մասնակցել է ավելի քան 50 մարդ, որոնք փակել են ճանապարհները այրվող ավտոմեքենաներով եւ պայթուցիկ սարքեր տեղադրել ամբողջ քաղաքում:

Վերջին տարիներին հաճախակի են դարձել բանկերի կողոպուտները, որոնցում հանցագործները պատանդներին օգտագործում են որպես «կենդանի վահան»:

Արասատուբայի քաղաքապետ Դիլադոր Բորխեսը ասել է, որ ոստիկաններն անում են հնարավորը: «Ոստիկանությունը չի կարող հարձակվել, չի կարող դիմադրել նրանց, քանի որ վտանգված են շատ կյանքեր», - ասել է նա Band TV-ին: Բորխեսն ասել է, որ չգիտի՝ կողոպտիչները պատանդներին ազատ արձակե՞լ են, թե ոչ, սակայն հայտնել է, որ անվտանգության ուժերը վերականգնել են քաղաքի կենտրոնի վերահսկողությունը: Քաղաքապետը մարդկանց հորդորել է մնալ տանը՝ նախազգուշացնելով նրանց պայթուցիկ սարքերի վտանգի մասին:

Հանցագործների լավ զինված բանդան երկուշաբթի վաղ առավոտյան հարձակվել է Արասատուբայի կենտրոնում գտնվող երեք բանկերի վրա: Կողոպուտից հետո բանդան պատանդներ է վերցրել եւ շրջապատել տեղի ռազմական ոստիկանության բաժանմունքը: Բանդայի անդամները փակել են նաեւ դեպի քաղաք տանող հիմնական ճանապարհները՝ այրելով ավտոմեքենաներ, հայտնել են տեղական լրատվամիջոցները:

Հեռուստալրագրող Յուրի Մակրին տեսանյութ է հրապարակել, որում, ըստ նրա, ֆիքսվել է փախուստի համար նախատեսված երկու մեքենա: 

Շատ բնակիչներ հայտնել են, որ լսել են կրակոցներ եւ նույնիսկ պայթյունների ձայներ: Ոստիկանությունը հաստատել է մեկ կասկածյալի եւ երկու այլ անձանց մահը: Եվս երեքը վիրավորվել են: Երկու կասկածյալ ձերբակալվել է:

G1 լրատվական կայքը հայտնել է, որ բանդան անօդաչուներ է օգտագործել՝ օդից ոստիկանության շարժումները վերահսկելու համար:

Սա առաջին դեպքը չէ, երբ Արասատուբան դառնում է բանկերի կողոպտիչների զոհ: 2017 թվականին հանցագործները վերահսկողություն են հաստատել քաղաքի տարբեր ռազմավարական կետերի վրա, հարձակումներ իրականացրել ոստիկանական բաժանմունքների վրա եւ փակել ճանապարհները՝ մասնավոր ընկերությունը թալանելիս:

Այս լավ ծրագրված կողոպուտները մաս են կազմում այն ​​բանի, ինչ բրազիլացիները կոչում են նոր «Կանգասո»՝  նկատի ունենալով տերմինը, որն առաջին անգամ օգտագործվել է՝ նկարագրելու բանդիտիզմը, որը պատուհասել էր Բրազիլիայի որոշ հատվածներ 1920-30-ական թվականներին:

Նախընտրելի թիրախները փոքր ու միջին քաղաքներն են եղել:

Անվտանգության հարցերով փորձագետ Գուարասի Մինգարդիի խոսքով՝ մասշտաբային կողոպուտները հաճախակիացել են 2015 թվականին: Թիրախը բանկերն ու ընկերություններն են, որոնք պահում եւ տեղափոխում են թանկարժեք իրեր: