նախընտրելի դարձնել
2021 թվականին դեղերի պետպատվերն առաջին անգամ յուրացվել է ավելի քան 100 տոկոսով: Այս մասին ապրիլի 13-ին Ազգային ժողովի նիստին, պատասխանելով պատգամավորների հարցերին, ասել է Հանրապետության առողջապահության նախարար Անահիտ Ավանեսյանը։
Նրա խոսքով, նախարարությունը երկու տարին մեկ թարմացնում է այն դեղամիջոցների ցանկը, որոնք պետպատվերով տրվում են քրոնիկ հիվանդություններով տառապող անձանց։
«Մեկ տարի առաջ հերթական վերանայումից հետո բարձր արդյունավետությամբ բազմաթիվ ժամանակակից դեղամիջոցներ ընդգրկվեցին ցուցակում, ինչից հետո քրոնիկ հիվանդություններով տառապողները սկսեցին ավելի հաճախ դիմել դրանց համար։ Այդպես, 2021 թվականին հատկացումներն ամբողջությամբ սպառվել են։ Առողջապահության նախարարությունը տարվա ընթացքում նույնիսկ պոլիկլինիկաներին է գումարներ տրամադրել լրացուցիչ գնումների համար։ Առաջիկա տարիներին նախատեսում ենք ավելացնել ամբուլատոր դեղամիջոցների մատակարարման մակարդակը։ Դա քրոնիկ հիվանդություններով հիվանդներին կօգնի խուսափել սրացումներից»,- ասաց Ավանեսյանը։
Բացի այդ, կընդլայնվի նաեւ հիվանդությունների ցանկը։ Դրանում նախատեսվում է ընդգրկել Առողջապահության համաշխարհային կազմակերպության ցանկում ընդգրկված հազվագյուտ հիվանդությունները։
