ԱՄՆ նախագահ Ջո Բայդենը ապրիլի 26-ին կընդունի պետական այցով ժամանող Հարավային Կորեայի նախագահ Յուն Սուկ Յոլին, հայտնել են Սպիտակ տանը։

Սպիտակ տան մամուլի քարտուղար Կարին Ժան-Պիեռն ասել է, որ այցը կնվիրվի ամերիկյան-հարավկորեական դաշինքի 70-ամյակին եւ կընդգծի Վաշինգտոնի «անդրդվելի հավատարմությունը» Հարավային Կորեային: Նրա խոսքով, երկու երկրների ղեկավարները կքննարկեն քաղաքական, տնտեսական եւ անվտանգության ոլորտում կապերի խորացումը։

Սա կլինի օտարերկրյա պետության ղեկավարի երկրորդ պետական այցը, որն ընդունում է Բայդենի վարչակազմը։ Մինչ այդ ԱՄՆ նախագահն ընդունել է իր ֆրանսիացի գործընկեր Էմանուել Մակրոնին։

«Բանակցությունների ընթացքում կքննարկվեն համատեղ պաշտպանական դիրքորոշմանը, ընդլայնված զսպմանը, բարձր տեխնոլոգիաներին եւ տնտեսական անվտանգությանը վերաբերող հարցեր, ինչը թույլ կտա ստեղծել «գործողության մեջ ամուր դաշինք», որը պաշտպանում է երկու երկրների ժողովուրդների կյանքն ու անվտանգությունը»,- ասվում է Հարավային Կորեայի նախագահի մամուլի քարտուղարի հայտարարության մեջ։

ԱՄՆ-Հարավային Կորեա դաշինքը առաջացել է 1950-53 թվականների Կորեական պատերազմից հետո, որն ավարտվել է փակուղով, որտեղ Չինաստանը աջակցել է Հյուսիսային Կորեային:

Այդ ժամանակից Վաշինգտոնն ու Սեուլը փորձել են զսպել Հյուսիսային Կորեային, սակայն չեն կարողացել կանգնեցնել նրա աճող միջուկային եւ հրթիռային ծրագրերը:

Նրանք նաեւ «կիսում են մտահոգությունը» Չինաստանի աճող հզորության վերաբերյալ, եւ Վաշինգտոնը Պեկինի դեմ դաշնակիցներին համախմբելու իր ջանքերում Սեուլին դիտարկում է որպես առանցքային գործընկերոջ: