նախընտրելի դարձնել
Սասեքսի դքսուհի Մեգան Մարքլը հայտարարել է, որ բախվել է առցանց «դաժան» հալածման և վիրավորանքների, որոնց «հիմնական մասը» տեղի է ունեցել նրա հղիության ընթացքում, հայտնում է CNN-ը։
Ելույթ ունենալով Տեխասում՝ South by Southwest (SXSW) փառատոնի բեմում, Մարքլն ասել է․ «Այժմ ես հեռու եմ մնում սոցցանցերից հանուն սեփական բարեկեցության։ Սոցցանցերում և համացանցում ինձ հետապնդելու և վիրավորելու հիմնական դեպքերը եղել են այն ժամանակ, երբ ես հղի էի Արչիով, Լիլիով և նրանց ծնվելուց անմիջապես հետո»:
Դքսուհին 2019 թվականի մայիսի 6-ին լույս աշխարհ է բերել Արչի Հարիսոն Մաունթբաթեն-Վինձորին՝ իր ամուսնուց՝ արքայազն Հարիից։ Այնուհետև 2021 թվականի հունիսի 4-ին զույգը ծնել է Լիլիբեթ Դիանա Մաունթբաթեն-Վինձորին։
2019 թվականի մարտին բրիտանական թագավորական ընտանիքը սոցցանցերի օգտատերերին հորդորել էր լինել «քաղաքավարի, բարի և հարգալից»՝ Մեգանի և Քեմբրիջի դքսուհի Քեյթի հասցեին առցանց վիրավորանքների բազմաթիվ դեպքերից հետո:
Մինչ այդ Քենսինգթոնյան պալատը սոցիալական ցանցերի ընկերություններից օգնություն էր խնդրել «չարաշահումների բումի» դեմ պայքարելու համար, որը ներառում էր սեքսիստական և ռասիստական մեկնաբանություններ:
Մեգանն ու արքայազն Հարին Արչիի հետ տեղափոխվել են Կալիֆորնիա 2020 թվականին բրիտանական թագավորական ընտանիքից հեռանալուց հետո և հաճախ քննադատել են Մեծ Բրիտանիայում և ԱՄՆ-ում մամուլի միջամտությունը իրենց կյանքին: Նույն թվականին զույգը դատական հայց է ներկայացրել Կալիֆորնիայում՝ իրենց որդու՝ Արչիի, պապարացիների արած լուսանկարների պատճառով։
