նախընտրելի դարձնելՖրանսիայի Վենդեա նահանգի կենտրոնը հանդիսացող Ֆոնտենե-լը-Կոնտ (Fontenay-le-Comte) քաղաքի Maison Billaud սրահում, նոյեմբերի 12-ին, բացվել է Ժան-Միշել Բերցի «Հայաստանի լույսը» խորագրով ֆոտոցուցահանդեսը:
ԱԳՆ մամուլի ծառայությունից NEWS.am-ին հայտնում են, որ միջոցառումը նվիրված է եղել Հայաստանի անկախության 20-ամյակին, որը նախաձեռնել էր Վանդեա-Հայաստան ընկերությունը (նախագահ Ֆրանսուազ Գովցյան): Ֆոտոցուցահանդեսի բացմանը ներկա են եղել Ֆրանսիայում ՀՀ դեսպան Վիգեն Չիտեչյանը, Ֆոնտենե-լը-Կոնտի քաղաքապետ Հյուգ Ֆուրաժը (Hugues Fourage):
Ցուցահանդեսի բացման արարողությանը նախորդած կարճատեւ հանդիպման ընթացքում դեսպանը քաղաքապետին տեղեկացրել է հայ-ֆրանսիական ապակենտրոնացված մակարդակով համագործակցության հարուստ փորձի մասին եւ ցանկություն հայտնել, որպեսզի Ֆոնտենե-լը-Կոնտը եւս միանա Հայաստանի հետ համագործակցության կապեր հաստատած ֆրանսիական 30 քաղաքներին ու շրջաններին:
Նույն օրը երեկոյան տեղի է ունեցել հանդիսավոր ընդունելություն, որին մասնակցել են Վանդեա նահանգի Գլխավոր Խորհրդի նախագահ, Սենատոր Բրունո Ռետայոն (Bruno Retailleau) եւ փոխնախագահ, Ֆրանսիայի Ազգային Ժողովում Ֆրանսիա-Հայաստան պատգամավորական խմբի անդամ Դոմինիկ Սուշեն: Ելույթներով հանդես են եկել ՀՀ դեսպան Վիգեն Չիտեչյանը, Բրունո Ռետայոն, Դոմինիկ Սուշեն եւ Վանդեա-Հայաստան ընկերության նախագահ Ֆրանսուազ Գովցյանը:
Հայաստանի դեսպանը հույս է հայտնել, որ առաջիկա տարիներին Վանդեայի եւ Հայաստանի միջեւ փոխշահավետ ապակենտրոնացված համագործակցությունը կշարունակի զարգանալ եւ ընդլայնվել:
Վանդեայի նահանգը Գլխավոր խորհրդի նախորդ նախագահ Ֆիլիպ դը Վիլիեի օրոք ակտիվ համագործակցության կապեր է հաստատել Հայաստանի հետ: Մասնավորապես, ամեն տարի Վանդեայի ձեռնարկություններն ուսումնական պրակտիկայի նպատակով հյուրընկալում են Հայաստանի Ֆրանսիական համալսարանի ուսանողներին: Համագործակցություն էր սկսվել նաեւ ՀՀ մշակույթի նախարարության հետ` Հայաստանի պատմա-մշակութային հուշարձաններից մեկի արժեւորման ծրագիր իրականացնելու նպատակով:
