Հայաստանում էլեկտրաէներգիայի հաճախակի անջատումների հիմնական պատճառը գործող համակարգի մաշվածությունն է։ Այս մասին սեպտեմբերի 20-ին Ազգային ժողովում «Էլեկտրաէներգիայի մատակարարման ոլորտի ժամանակակից հիմնախնդիրները և դրանց լուծման ուղիները» թեմայով լսումների ժամանակ ասաց Հանրային ծառայությունները կարգավորող հանձնաժողովի նախագահ Գարեգին Բաղրամյանը։

Նրա խոսքով՝ ռեսուրսները, որոնք պետք է հատկացվեին սպասարկման ոլորտում աշխատելու համար, օգտագործվել են այլ նպատակներով։

«Նոր հաճախորդների միացումների կանխատեսվող թիվն ավելացել է»,- պարզաբանեց Բաղրամյանը:

Միաժամանակ նա հավելեց, որ վերանայվել է նոր միացման վճարը։ Մասնավորապես, այն էականորեն բարձրացվել է և շուկայական գների հասցվել։