նախընտրելի դարձնել
Եվրոպական երկրները պատրաստվում են Ուկրաինայի նկատմամբ Վաշինգտոնի կուրսի հնարավոր փոփոխությանը և ռազմական կապերի թուլացմանը, եթե Դոնալդ Թրամփը հաղթի ԱՄՆ նախագահական ընտրություններում, The Washington Post-ին ասել են հինգ առաջատար երկրների 15 քաղաքական գործիչներ, դիվանագետներ և վերլուծաբաններ։
Եվրոպայում ԱՄՆ-ի ամենամոտ դաշնակիցները պատրաստվում են Թրամփի հաղթանակի դեպքում անդրատլանտյան հարաբերությունների հնարավոր խզմանը։ Միևնույն ժամանակ, զրուցակիցները նշում են, որ իրենք ավելի լավ են պատրաստված Թրամփի երկրորդ նախագահությանը։ Նրանք պնդում են, որ գիտեն, թե ինչ դիվանագիտական քայլեր է պետք ձեռնարկել, և տարբեր ծրագրեր են մշակում անվտանգության և առևտրի ոլորտում փոփոխությունների դեպքում։
Որոշ առումներով ԵՄ-ն ավելի քիչ պատրաստված է Թրամփին, քան նրա առաջին նախագահության ժամանակ, քանի որ այն ժամանակ նրան հակադրվում էր «Եվրոպայի վճռորոշ գործիչը»՝ Գերմանիայի կանցլեր Անգելա Մերկելը: Այս պահին մայրցամաքում նրա մակարդակի առաջնորդ չկա։
Եվրոպացի բարձրաստիճան պաշտոնյաներն ու դիվանագետները կարծում են, որ ԱՄՆ նախագահի մյուս թեկնածուն՝ Քամալա Հարիսը, կհետևի նախագահ Բարաք Օբամայի, և ոչ թե Ջո Բայդենի քաղաքականությանը և ԱՄՆ-ի ուշադրությունը կտեղափոխի Ասիա: Հարիսի ազգային անվտանգության խորհրդական Ֆիլիպ Գորդոնը Եվրոպայի փորձագետ է, որն աջակցում է Ուկրաինային «երկարաժամկետ» օգնությանը: Սակայն, նա նաև հանդես է գալիս «Եվրոպայի և Միացյալ Նահանգների միջև առավել իրատեսական գործարքի» օգտին:
«Մի բան պարզ է՝ մենք այստեղ նստած չենք, ինչպես նապաստակը լուսարձակների մեջ։ Անկախ նրանից, թե ով կհաղթի ԱՄՆ-ի ընտրություններում, Ամերիկայի ապագա ուշադրությունը գնալով ավելի ու ավելի է կենտրոնանալու հնդկախաղաղօվկիանոսյան տարածաշրջանի վրա: Եվրոպան էլ ավելին պետք է անի իր անվտանգության համար»,- ասել է գերմանական պաշտպանական գերատեսչության ներկայացուցիչ Միխայել Շտեմպֆլեն:
