Պորտուգալիայի նախագահ Մարսելո Ռեբելո դե Սոզան մարտի 13-ի երեկոյան ելույթի ժամանակ հայտարարել է խորհրդարանը Լուիս Մոնտենեգրոյի կառավարությանն անվստահություն հայտնելուց հետո խորհրդարանը ցրելու մասին, հայտնում է RTP-ն։

Դե Սոզան ասել է, որ խորհրդարանի արձակումից հետո արտահերթ ընտրությունները կանցկացվեն մայիսի 18-ին, «այն օրը, որը նախընտրում են կուսակցությունների մեծ մասը»:

Պորտուգալիայի նախագահի որոշումը կայացվել է Պետական ​​խորհրդի նիստից հետո, խորհրդատվական մարմին, որի մասնակցությունը սահմանադրորեն պարտադիր է նման որոշումների համար:

Հիշեցնենք, որ մարտի 11-ին Պորտուգալիայի խորհրդարանը, ինչպես և սպասվում էր, պաշտոնանկ արեց Մոնտենեգրոյի գլխավորած աջ կենտրոնամետ կառավարությանը, որը սկանդալի մեջ էր հայտնվել շահերի բախման պատճառով։

Ճգնաժամի կենտրոնում վարչապետի ընտանիքին պատկանող խորհրդատվական ընկերությունն է։ Այն պայմանագրեր է կնքել մասնավոր ընկերությունների հետ, որոնք ընդդիմության կարծիքով, բերել են  Մոնտենեգրոյի հարստացմանը։